Avropa Parlamentində Azərbaycana qarşı sanksiya çağırışı
Azərbaycandakı repressiya və korrupsiya Avropa Parlamentində müzakirə olundu; məmurlara qarşı sanksiyalar gündəmə gəldi
Azərbaycanda insan haqlarının acınacaqlı durumu, repressiyaların güclənməsi və korrupsiya dünən Avropa Parlamentində müzakirə olunub.
Avropa Parlamentinin Portuqaliyadan olan deputatı Anna Qomes çıxışında deyib ki, Azərbaycanda, Hindistanda, Qvatemalada korrupsiya yolu ilə əldə olunan və bu ölkələrdən çıxarılan pullar Avropa Birliyinin bankları vasitəsilə gedir. Həmin vəsaitlər Avropada daşınmaz əmlaka yatırılır.
ABŞ-ın Azərbaycandakı səfirliyinin əməkdaşı olmuş, hüquq müdafiəçisi Rebekka Vinsent ölkəmizdəki vəziyyət barədə danışıb. Bildirib ki, ötən yay Bakıda keçirilən Avropa Oyunlarından bəri ötən müddətdə bu ölkədə durum qətiyyən yaxşılığa doğru dəyişməyib. Azərbaycanda korrupsiyanın geniş yayıldığını deyən Vinsent qeyd edib ki, vəziyyət getdikcə daha da pisləşir: “Beynəlxalq aləmin bu ölkədə baş verənlərə diqqəti təqdirəlayiq hal olsa da, konkret addımlar görmürük. Azərbaycan ən korrupsiyalaşmış ölkələrdən biridir. Şəffaflığa görə dünyada 119-cu yerdədir. Əliyev ailəsi və digər oliqarxlar dövlət fondları sahəsində illərlə korrupsiya ilə məşğuldular”.
Hakimiyyət anti-Gülən kampaniyasından bəhanə kimi istifadə edir
Rebekka Vinsent çıxışında vurğulayıb ki, araşdırmaçı jurnalist, “Azadlıq” radiosunun əməkdaşı Xədicə Ismayıl korrupsiyanı ifşa edirdi, elə bu fəaliyyətinə görə də həbs olundu: “Xədicə həbsdən buraxılsa da, ölkədən çıxa bilmir. Bir çox başqaları da eyni vəziyyətdədir. Onlar ölkə boyda həbsxananı tərk edə bilmirlər. Azərbaycanda onlarla siyasi məhbus həbsdədir. Azərbaycan hakimiyyəti həbsləri davam etdirir. Jurnalistlər, fəallar islamçılarla əlaqədə ittiham olunub tutulurlar. Avqust ayında yeni repressiya dalğası başlayıb. Azərbaycan hakimiyyəti Türkiyənin anti-Gülən kampaniyasından bəhanə kimi istifadə edərək, öz rəqiblərini susdurmaq üçün repressiyaların növbəti mərhələsinə start verib. Uzun illər hakimiyyətin ciddi təzyiqlərinə məruz qalan ”Azadlıq” qəzetinin direktoru Faiq Əmirli bu repressiya dalğası çərçivəsində həbs olunub. Elə bu ay ərzində müxtəlif ittihamlarla Natiq Cəfərli, Elgiz Qəhrəman və digərləri həbs olunub. Ondan əvvəl də Heydər Əliyevin heykəlini yazdıqlarına görə gənc fəallar Qiyas Ibrahimov və Bayram Məmmədov bir neçə aydır ki, həbs olunmuşdu. Bundan başqa, NIDA Vətəndaş Hərəkatının üzvü Ilkin Rüstəmzadə, “Azadlıq” qəzetinin əməkdaşı Seymur Həzi illərdir ki, həbsdə saxlanılır”.
“Avropa Birliyi məmurlara qarşı sanksiya məsələsinə baxmalıdır”
Azərbaycanda sentyabrın 26-da Konstitusiyaya dəyişikliklər məqsədilə referendum keçiriləcəyini avropalı deputatların nəzərinə çatdıran xanım Vinsent qeyd edib ki, hakimiyyət bu referendum haqda istənilən tənqidi fikirləri boğur.
Rebekka Vinsent REAL hərəkatının sədri Ilqar Məmmədovun həbsinə də toxunub. Hüquq müdafiəçisi Azərbaycandakı digər siyasi məhbusların da adlarını sadalayıb, hər birinin nəyə görə tutulmasından danışıb.
Azərbaycanda medianın durumuna diqqət çəkən Rebekka Vinsent qeyd edib ki, hakimiyyət medianı öz nəzarəti altında saxlayır. Bu sahədə durum getdikcə də pisləşir.
“Hesab edirəm ki, Avropa Birliyi insan haqlarını pozan, repressiyalarda iştirak edən ayrı-ayrı məmurlara qarşı fərdi sanksiyalar məsələsinə baxmalıdır. Fərdi sanksiyalar vacibdir. Belə sanksiyalar korrupsiyaya qarşı mübarizədə də səmərəlidir”, – deyə Rebekka Vinsent bildirib.
Hüquq müdafiəçisi deyir ki, Avropa Birliyi Azərbaycanda islahatlara yardım edə bilər. Ancaq Azərbaycan tələb olunan islahatları aparmır. Məhbuslar buraxılmır. Qanunvericilik dəyişdirilmir: “Avropa Birliyi öz nüfuzundan istifadə etməlidir. Azərbaycanın indiki böhran şəraitində beynəlxalq aləmə ehtiyacı var”.
