Gözəl Bayramlı ilə bağlı apelyasiya şikayətləri təmin edilmədi

Vəkil: “Avropa İnsan Haqları Məhkəməsinə müraciət edəcəyik”

Bu haqda Azadliq.info məlümat verir.

“Gözəl Bayramlı barəsində həbs qətimkan tədbiri seçilməsindən verdiyimiz apelyasiya şikayətinə baxıldı. Hakim Abid Abdinbəyov şikayətimizi təmin etmədi”.

Vəkil Elçin Sadıqovun sözləridir. O, iyunun 2-də Bakı Apelyasiya Məhkəməsində Azərbaycan Xalq Cəbhəsi Partiyasının (AXCP) sədr müavini Gözəl Bayramlı ilə bağlı daha 2 işə də baxıldığını söyləyib:

“Daha sonra Gözəl Bayramlının qeydiyyatda olduğu evdə axtarış və götürməylə bağlı verdiyimiz şikayətə baxıldı. Həmin şikayət də təmin olunmadı. Sədrlik edən hakim Mirzəli Abbasov idi. Əlavə olaraq Gözəl Bayramlının yaşadığı evdə aparılan axtarış və götürmə ilə bağlı verdiyim apelyasiya şikayətinə də baxıldı. Həmin şikayətə isə hakim Əflatun Qasımov sədrlik edirdi. O da təmin edilmədi”.
Elçin Sadıqov deyir ki, bütün bu şikayətlərdən Avropa İnsan Haqları Məhkəməsinə müraciət edəcəklər:

“Hazırda Gözəl Bayramlı barəsində başlanmış saxta cinayət işi Baş Prokurorluğun Ağır Cinayətlərə Dair İstintaq İdarəsinin icraatına verilib”.