Siyasət

Azərbaycan ordusu bir gündə iki əsgər itirib

İyulun 26-da Azərbaycan ordusunun əsgəri Ramil Fazil oğlu Cəlilovun nəşinin yaşadığı Bakı şəhərinin Sulutəpə qəsəbəsinə gətirildiyi bildirilir. Yaxınlarının Meydan TV-yə verdiyi məlumata görə, 21 yaşlı Ramil Cəlilovun Ağdamdakı N saylı hərbi hissədə xidmət etdiyi deyilir. İlkin məlumatlara görə, əsgər elektrik cərəyanı vurması nəticəsində ölüb. Ailəsi ətraflı açıqlama vermək istəməyib.

İyulun 26-da daha bir Azərbaycan hərbçisinin nəşi evinə gətirilib. Bu, Tərtər rayonunda xidmət etdiyi bildirilən Azərbaycan Milli Ordusunun zabiti, baş leytenant Kamran Elçin oğlu Əliyevdir. Məlumatı ilk olaraq sosial şəbəkədə jurnalist Əzizə İsmayılova paylaşıb.

Zabitin nəşi Bakıya, Binəqədi rayonu, Məsud Davudoğlu küçəsindəki evinə gətirilib. Əzizə İsmayılovanın qonşulardan əldə etdiyi məlumata görə, 25 yaşlı zabit özünü güllə ilə vuraraq intihar edib. Başqa bir mənbədə isə onun öz hərbçi yoldaşı tərəfindən ehtiyatsızlıqdan vurularaq öldürüldüyü bildirilir.

Mələk Əliyeva adlı başqa bir “Facebook” istifadəçisi isə Kamran Əliyevin 7 aylıq körpəsinin atasız qaldığını yazıb.

Meydan TV yazır ki, Azərbaycan bir gündə iki əsgər itirsə də, Müdafiə Nazirliyi bu barədə heç bir açıqlama verməyib. “Xəzər” Hərbi Tədqiqatlar İnstitutunun yaydığı məlumata görə 2019-cu ildə Azərbaycanın Təhlükəsizlik və Müdafiə sektorunda ən azı 20 hərbi qulluqçu ölüb. Onların 5 nəfəri döyüş, 15 nəfəri isə qeyri-döyüş itkisidir.

Daha çox göstər
Back to top button