BaşlıcaSiyasət

ABŞ öz vətəndaşlarını koronavirusla əlaqədar Azərbaycana səfərdən imtinaya çağırır

ABŞ Dövlət Departamenti vətəndaşlara koronavirusun aşkarlandığı ölkələrə səfərlərdən yayınmaqla bağlı çağırış edib. Dövlət Departamentinin təqdim etdiyi siyahıda Azərbaycanın da adı yer alıb.

Məlumatı “Turan” informasiya agentliyi yayıb.

Dövlət Departamentinin çağırışında xüsusən, “İranla sərhəddən gələn COVİD-19 hallarının sayının xeyli artması ilə əlaqədar Azərbaycana səfərlərdən imtina etmək” tövsiyə olunur.

“Azərbaycan hökuməti beynəlxalq səyahətçilərdə COVİD-19 simptomlarının olub-olmadığını yoxlayır və şübhəli hallar üçün xüsusi karantin müəssisələrində icbari karantin tətbiq edib. Azərbaycanda tibbi xidmət ABŞ standartlarına uyğun deyil və bəzi bölgələrdə əsas tibbi ləvazimatlar əlçatan olmaya bilər”, -deyə tövsiyədə qeyd edilib.

Buna baxmayaraq amerikalılar Azərbaycana getməyə qərar veriblərsə, bütün mümkün riskləri nəzərə almaları və ABŞ hökumətinin köməyi olmadan qayıtmaq planı hazırlamaları tövsiyə olunur.

Bu gün Azərbaycanda 9 nəfərdə koronavirus aşkar edilib, onların 7-si ölkə vətəndaşı, biri Rusiya, biri isə Almaniya vətəndaşıdır. Onların İranda xəstəliyə yoluxduğu bildirilir.

Daha çox göstər
Back to top button