Rusiyanın xarici işlər naziri Sergey Lavrov Moskvada erməni həmkarı Ara Ayvazyanla apardığı müzakirələrdən sonra bildirdi ki, danışıqlar Yerevan və Moskva arasında mövcud olan atmosferə tam uyğun olaraq, dostluq, tərəfdaşlıq mühitində keçirilib.
Lavrov qeyd etdi ki, noyabr ayında Ermənistana səfəri zamanı 9 noyabrda imzalanan üçtərəfli bəyanatdan sonrakı vəziyyəti, münaqişənin tam həlli üçün tələb olunan addımları müzakirə ediblər. Ermənistan-Rusiya ikitərəfli münasibətlərinə da toxunublar.
“Üçtərəfli bəyanatın imzalanması Dağlıq Qarabağ münaqişəsinin ədalətli əsasda, erməni və Azərbaycan xalqlarının maraqları çərçivəsində uzunmüddətli və dayanıqlı nizamlanması üçün bütün lazımi şəraiti yaradır. Biz bunun fəal tərəfdarıyıq.
Biz bir aya yaxındır ki, atəşkəsə riayət olunmasından məmnunuq. Qaçqınlar qayıdır. Həlak olanların cəsədlərinin və hərbi əsirlərin mübadiləsində, itkin düşənlərin axtarışında hərəkətlilik var. Bu kimi kəskin humanitar məsələlər tez bir zamanda həll olunmalıdır. Biz bərpa prosesində, iqtisadiyyat və infrastrukturun, səhiyyə sisteminin bərpa olunmasında maraqlıyıq”,- deyə o bildirdi.
Lavrov bildirdi ki, görüşdə Dağlıq Qarabağ üzrə humanitar reaksiya mərkəzinin yaradılmasının praktiki aspektləri müzakirə olunur.
“Biz Prezident Putinin təşəbbüsü ilə humanitar mərkəzin yaradılması ilə bağlı olan məsələlər barədə danışmışıq. Biz bu mərkəzi Ermənistan və Azərbaycanın iştirakı ilə beynəlxalq etməyi təklif etmişik”,- deyə Lavrov qeyd etdi.
