ATƏT-in Minsk Qrupu həmsədrləri Qarabağdakı vəziyyətin həllində faydalı rol oynaya bilər. Bunu Federasiya Şurasının beynəlxalq məsələləri üzrə komitənin rəhbəri Qriqori Karasin “Kommersant”a müsahibəsində deyib.
“Düşünürəm ki, onlar [ATƏT-in Minsk Qrupu həmsədrləri Rusiya, Fransa, ABŞ] bu prosesdə faydalı rol oynaya bilərdilər. Bu üçlüyün təcrübəsi və güclü xarici dəstəyi var. Elə görünür ki, ATƏT həmsədrlərinin himayəsi altında Azərbaycan və Ermənistan xarici işlər nazirlərinin müntəzəm görüşləri praktikası bərpa oluna bilər ki, bu da nəzərəçarpacaq beynəlxalq rezonans doğuracaq”- deyə Karasin qeyd edib.
O əlavə edib ki, indi məsələlərin çoxu humanitar məsələlərlə bağlıdır: hərbi əsirlərin mübadiləsinin tamamlanması, qurbanların cəsədləri, qaçqınların qaytarılması və onların yaşamaları üçün müvafiq şəraitin yaradılması. Dağlıq Qarabağ ərazisi və ona bitişik ərazilərin minalardan təmizlənməsi məsələsi də kəskindir.
Karasinə görə, çox şey tərəflər arasında etimadın qurulmasının mümkün olacağından asılı olacaq: “Artıq konkret addımlar atılıb. Rusiya prezidentinin təşəbbüsü ilə siyasi məsələlərə dair müzakirələr davam edir, həll yolları axtarılır. Üçtərəfli komissiya iqtisadi, nəqliyyat və maddi-texniki məsələləri müzakirə etmək üçün baş nazir müavinləri səviyyəsində səylə çalışır”.
