Müharibə nəticəsində Azərbaycanda əsir götürülən insanlar Beynəlxalq Qırmızı Xaç Komitəsinin nümayəndələri vasitəsilə ailələrinə video mesaj göndəriblər. Məlumatı “Sputnik Armeniya”ya BQXK-nın Ermənistandakı nümayəndə heyətinin rabitə proqramlarının rəhbəri Zara Amatuni verib.
“Beynəlxalq Qırmızı Xaç Komitəsi əsirlər və ailələri arasındakı əlaqəni yaxşılaşdırmağa çalışır. Əlbəttə, hər şey prosesdə iştirak edən səlahiyyətlilər tərəfindən razılaşdırılır. Başqa sözlə, məktublarla yanaşı başqa rabitə vasitələri də təmin etmək mümkün oldu: telefon zəngi edə bildiyimiz hallar da oldu. Bu yaxınlarda ziyarətlər çərçivəsində videolar hazırlanıb”- deyə Amatuni qeyd edib.
O bildirdi ki, video mesajlar artıq əsirlərin ailələrinə çatdırılıb. Amatuni qeyd edib ki, əsirlərlə qohumları arasında bu əlaqə vasitəsi ilk dəfə həyata keçirilib.
Video rabitə məsələsinə gəlincə, Amatuniyə görə bölgəmizdə belə fürsət hələ olmayıb, amma hər şey bu prosesdə iştirak edən səlahiyyətlilərin razılığından asılıdır.
“Biz, əsirlərin həbsdə olduqları zaman qohumları ilə əlaqə qurmasına imkan vermək üçün mümkün olanı təşkil etməyə çalışırıq”- deyə Amatuni qeyd edib.
