Ermənistan Xarici İşlər Nazirliyi, erməni əsirlərinin Azərbaycan tərəfindən cinayət təqibinə məruz qalması ilə bağlı bəyanat yayıb.
Ermənistan Respublikası Xarici İşlər Nazirliyi, Artsaxa qarşı son təcavüz zamanı Azərbaycan tərəfindən tutulan Lyudvik Mkrtçyan və Alyoşa Xosrovyanın rəsmi Bakı tərəfindən cinayət təqibini qətiyyətlə pisləyib.
Bəyanatda bildirilir ki, Azərbaycan tutulan 14 erməni hərbçisinə qarşı da saxta cinayət təqibinə başlayıb və 2020-ci il 9 noyabr tarixli üçtərəfli bəyanatda nəzərdə tutulan razılaşmaları pozub.
“16 erməni hərbçisinə qarşı açılan cinayət işləri, habelə digər erməni əsirləri və girov götürülmüş mülki şəxslərə işgəncə və psixoloji təzyiqlər beynəlxalq hüququn təhlükəli şəkildə pozulmasının presedentidir. Aydın məsələdir ki, Azərbaycan əsir götürülmüş şəxslərdən siyasi girov kimi istifadə edir, bu da digər məqsədlər daşıyır.
Rəsmi Bakı, həmçinin Avropa İnsan Hüquqları Məhkəməsinin (AİHM) Azərbaycanda əsir götürülmüş erməni hərbçilər və mülki şəxslər barədə məlumat verməklə bağlı müvafiq qərarlarını açıq şəkildə nəzərə almır. Üstəlik, Azərbaycanda əsirlikdə olan şəxslərlə bağlı bir sıra sübutlara, videolara və vətənə qayıtmış əsirlərin ifadələrinə baxmayaraq, Azərbaycan bunu inkar edir və bu bir sıra ağır cinayətlərə dair şübhələri artırır.
Azərbaycanda saxlanılan erməni hərbi əsirlər və mülki şəxslər ən qısa müddətdə azad edilməli və heç bir şərt qoyulmadan vətənə qaytarılmalıdır”,-bəyanatda deyilir.
