Amerika Erməni Assambleyası 907 saylı qətnamənin dayandırılmasının qəti əleyhinədir. Azərbaycana təklif edilən hər hansı yardım barədə Konqresə əvvəlcədən məlumat verilməli, həmçinin əvvəlki qeyri-mütənasib hərbi yardıma görə cavabdehlik təmin edilməlidir.
Bu barədə Amerikadakı Erməni Assambleyasının bəyanatında qeyd olunub.
“Dünən Dövlət Departamenti 907 saylı qətnaməsinin dayandırılması ilə bağlı imzalanmış variantı Konqresə təqdim edib. Son administrasiya dövründə Ermənistan və Azərbaycana göstərilən hərbi yardımın bərabərsizliyini və Azərbaycanın Ermənistan və Artsaxa qarşı düşmənçilik fəaliyyətini nəzərə alaraq Assambleya 907 saylı qətnamənin dayandırılmasının qəti əleyhinədir.
Konqresə Azərbaycana təklif olunan hər hansı yardım barədə əvvəlcədən məlumat verilməlidir, əvvəlki qeyri-mütənasib hərbi yardım ilə bağlı hesabatlılığı da təmin olunmalıdır.
Amerikadakı Erməni Assambleyası Konqresi erməni xalqının daha bir soyqırımının qarşısının almağa və ABŞ-ın dəyərlərini və bütövlüyünü müdafiə etməyə çağırır”,- deyə bəyanatda qeyd olunub.
Assambleya ABŞ-ın Ermənistandakı səfiri vəzifəsinə Kristina Kvienin namizədliyini alqışlayır.
