Rusiya Qara dənizdə Qərb üçün gözlənilməz tərəfdaş əldə edib. “Armenpress”in məlumatına görə, bu barədə Şuşanik Minasyan “The National Interest” nəşrində yazır. “Qara dəniz regionunda geosiyasi vəziyyətdə mühüm dəyişikliklər baş verib.
Onlar ilk növbədə Türkiyə kimi gözlənilməz tərəfdaş tapan Rusiya ilə bağlıdır” – deyə nəşr yazır. Müəllif hesab edir ki, soyuq müharibə başa çatdıqdan sonra Qərb siyasətçiləri regiona böyük ölçüdə məhəl qoymayıblar, Moskva və Ankara isə öz siyasi və iqtisadi potensiallarını gücləndirmək üçün intensiv işləyiblər. Məqalədə deyilir ki, iki ölkə əsasən öz milli maraqlarına uyğun gələn yeni regional nizam yaratmaq üçün səyləri gücləndiriblər.
Minasyanın sözlərinə görə, Rusiya və Türkiyə təsir dairələrinin qarşılıqlı tanınması və qarşılıqlı faydalı nəticələr üçün güzəştə getmək istəyi əsasında münasibətlər modeli yarada biliblər. Bu, onlara təsirlərinin əhəmiyyətli dərəcədə artmasına nail olmağa imkan verib. Üstəlik, onlar faktiki olaraq Qara dənizdə Qərbə qarşı mübarizə aparmaq üçün səylərini birləşdiriblər. Jurnalist xatırladıb ki, Sovet İttifaqının dağılmasından sonra Ankara Qərb dövlətləri tərəfindən Moskvaya qarşı tarazlıq kimi görünsə də, Türkiyənin xarici siyasəti Qərb üçün gözlənilməz vektora çevrilib və Türkiyə tərəfi Rusiya ilə mübarizə aparmaq əvəzinə onunla fəal əməkdaşlıq etməyə başlayıb, RİA Novosti bildirib.
