Larsın ötürmə qabiliyyəti son 1,5 ay ərzində əhəmiyyətli dərəcədə artıb. Bunu Ermənistanın iqtisadiyyat naziri Vahan Kerobyan ER hökumətinin növbəti iclasından sonra jurnalistlərə verdiyi brifinqdə deyib.
“Erməni avtomobillərinin keçidi iki dəfə artıb. Əgər iki ay əvvəl Larsdan keçən erməni avtomobillərinin orta gündəlik sayı 130 idisə, indi bu, təxminən 250-yə çatıb”.
Kerobyanın sözlərinə görə, tez xarab olan malların sürətlə keçidi kənd təsərrüfatı ixracatçılarının işini xeyli yüngülləşdirib və riskləri azaldıb.
“Düşünürük ki, yaxın bir ay ərzində növbə problemi tam həll olunacaq, növbələr aradan qalxacaq, hava şəraiti pisləşənə qədər problemimiz olmayacaq”,-deyə nazir bildirib.
Bərə daşıma variantlarına toxunan nazir bildirib ki, məsələnin yaxın günlərdə həll olunacağı gözlənilir. “Əgər belə olmasa, biz eyni şeyi edə və Batumi limanı vasitəsilə alternativ variant yarada biləcəyik. Problem ondadır ki, Hollandiya şirkəti Rusiyaya qarşı sanksiyalara qoşulub və sanksiyalara görə icazənin alınması gecikir”.
