Azərbaycan hərbi əməliyyatlar yolu ilə Syunik bölgəsinə nəzarəti bərqərar etmək istəyir. Bunu Ermənistan parlamentinin Müdafiə Komitəsinin sədr müavini Armen Xaçatryan ötən həftə Sankt-Peterburqda KTMT-yə üzv dövlətlərin parlamentlərinin müdafiə komitələrinin iclası zamanı bəyan edib.
“Azərbaycan Ermənistanın suveren ərazisi ilə bağlı ambisiyalarını açıq şəkildə bəyan edir və ölkənin cənub hissəsinə, Naxicevan ilə əlaqə yaratmağa imkan verəcək Syunik bölgəsinə nəzarətin bərqərar olması üçün fəal hərbi əməliyyatları davam etdirməyə hazırdır.
Azərbaycan silahlı qüvvələrinin döyüş potensialının ölkə ərazisində, Naxicevanda artıq öz hərbi birləşmələri olan, ümumi sayı mindən artıq olan türk birləşmələri hesabına artırılmasını istisna etmirik”,-deyə Xaçatryan qeyd etdi.
Xaçatryan KTMT-nin susqunluğunu və fəaliyyətsizliyini kəskin tənqid edib: “Azərbaycan son bir ildə, yəni 2021-ci ildən 2022-ci ilə kimi KTMT üzvü olan Ermənistanın suveren ərazisini işğal edərək Ermənistanın təxminən 127 kvadrat kilometr ərazisini nəzarətə götürdüyü halda, nə üçün alyans Ermənistana heç bir hərbi addım atmır, hətta humanitar yardım da etmir?”
“Niyə Ermənistana hərbi yardımın göstərilməsini istisna edən qərar qəbul edilir? Müttəfiq dövlətin ərazisinin təcavüzünə və işğalına niyə heç olmasa bəyanatlar səviyyəsində reaksiya verilmir? Ermənistanın suveren ərazisi niyə “mübahisəli ərazi” adlanır? Niyə KTMT-nin heç olmasa humanitar yardım göstərmək qərarı yoxdur?”,-deyə o əlavə etdi ki, erməni cəmiyyətində çoxlu “niyə”lər yığılıb və məhz KTMT-nin susqun hərəkətsizliyi və passivliyi, eləcə də Azərbaycanı faktiki dəstəkləyən bəzi müttəfiqlərin rəsmi bəyanatları Ermənistan cəmiyyətinin əhəmiyyətli hissəsinin bu təşkilatdan çıxmaq tələbi irəli sürməsinə səbəb olub.
Xaçatryan KTMT Müqaviləsinin 4-cü maddəsini xatırladır ki, ona görə üzv dövlətlərdən hər hansı biri təcavüzə məruz qalarsa, alyans bunu bütün üzv dövlətlərə qarşı təcavüz kimi qiymətləndirəcək. Belə olan halda iştirakçı dövlətlər də hərbi yardım göstərməlidirlər.
Xaçatryanın sözlərinə görə, bu məqamı həyata keçirmək üçün KTMT-nin Azərbaycanı təcavüzkar adlandıraraq pisləyən siyasi bəyanatla çıxış etməsi lazımdır.
