Artsax Respublikasının Dövlət naziri, Operativ qərargahın rəhbəri Ruben Vardanyanın rəhbərliyi altında yanvarın 31-də Artsaxın Azərbaycan tərəfindən davam edən blokadası altında əhalinin güzəranının təmin edilməsi ilə bağlı bir sıra məsələlər müzakirə edilib.
Dövlət naziri aparatının mətbuat xidmətinə istinadən verdiyi məlumata görə, ərzaq məhsulları, benzin və dizel yanacağı bazarlarında, infrastruktur sahəsində mövcud vəziyyət təqdim olunub.
Bildirilib ki, kupon sisteminin tətbiqi ərzaq problemini müəyyən qədər yüngülləşdirib, lakin blokada nəticəsində əhali bir sıra mühüm məhsulları almaq imkanından məhrum olmaqda davam edir.
Benzin və dizel yanacağı bazarındakı vəziyyətə gəlincə, ehtiyatların qıtlığı qeyd edilib və ciddi qənaət rejiminin saxlanmasının vacibliyi vurğulanıb.
Sessiyada yaz kənd təsərrüfatı işlərinə hazırlıq və yaz əkininin təşkili məsələləri də müzakirə olunub. Dövlət naziri yaz səpinlərinin vaxtında aparılması məsələsini xüsusilə ərzaq təhlükəsizliyi baxımından mühüm hesab edərək, hazırda toxumların daşınması ilə bağlı işlərin aparıldığını diqqətə çatdırıb.
Operativ qərargah üzvlərinin icmalarda əhali ilə mütəmadi görüşlər silsiləsini artıq başa çatdırdıqlarını nəzərə alan dövlət naziri qaldırılan məsələləri ümumiləşdirmək və onların həlli ilə bağlı təkliflər təqdim etməyi məsul şəxslərə tapşırıb.
