İran parlamentinin Milli Təhlükəsizlik Komitəsinin sədr müavini Abbas Müqtədai Azərbaycana Tehrandakı səfirliyə hücumla bağlı vəziyyəti gərginləşdirməmək barədə xəbərdarlıq edib.
“Azərbaycan hakimiyyəti bilməlidir ki, mehriban qonşuluq prinsipi həmişə İranın gündəmində olub. Azərbaycanın beynəlxalq strukturlarda İrana qarşı şikayəti düşmən davranış kimi qiymətləndirilir. İran Azərbaycanın cənubda böyük qonşusudur və vəziyyəti gərginləşdirmək və iki ölkə arasında atmosferi təhdid edən problemlər yaratmaq Azərbaycanın maraqlarına uyğun deyil”, – deyə Müqtədai qeyd etdi.
O, səfirliyə hücumun dövlət tərəfindən dəstəklənmədiyini və bunun şəxsi motivlərinin olduğunu vurğulayıb və əlavə edib ki, İranla münasibətlərin pisləşməsindən yalnız Azərbaycan əziyyət çəkəcək.
“Azərbaycanla Ermənistan arasındakı mübahisələrdə biz gərginliyi azaltmağa öyrəşmişik, lakin Azərbaycan fərqli reaksiya verir. Azərbaycan İranla dostluqdan ilk faydalanan ölkədir, Azərbaycan da İranla düşmənçilikdən ilk zərər çəkəcək”, – deyə o bildirib.
Müqtədai hesab edir ki, sionist rejim Azərbaycanın yaxın gələcəkdə öz nəzarətinə keçməsini istəyir və bu, regionda gərginliyə səbəb olur.
