Avropa İttifaqı Laçın dəhlizi boyunca və ətrafında baş verən hadisələri və onların humanitar nəticələrini diqqətlə izləyir. Bu barədə Avropa İttifaqının Xarici İşlər və Təhlükəsizlik Siyasəti üzrə Ali Nümayəndəsi Cozep Borrel Avropa Parlamentinin üzvü Dimitris Papadakisin Dağlıq Qarabağda Laçın dəhlizinin blokadası nəticəsində yaranmış humanitar böhranla bağlı 2022-ci il 21 dekabr tarixinə ünvanlanan yazılı sualları cavablandıraraq qeyd edib. Bu barədə “Armenpress” agentliyi Dimitris Papadakisin bəyanatına istinadən xəbər verir.
“Avropa İttifaqı sərbəst hərəkət və zəruri malların tədarükünə davam edən məhdudiyyətlər səbəbindən yerli əhalinin çəkdiyi iztirablardan ciddi şəkildə narahatdır”, – deyə Borel yazıb.
Aİ diplomatiyasının rəhbəri vurğulamışdır ki, o, Avropa İttifaqının Cənubi Qafqaz üzrə xüsusi nümayəndəsi Toivo Klaarla birlikdə tərəflərlə daim sıx təmasdadır.
Aİ Azərbaycanı 2020-ci il 9 noyabr tarixli üçtərəfli bəyanata uyğun olaraq dəhliz boyunca hərəkətin azadlığını və təhlükəsizliyini təmin etmək üçün öz yurisdiksiyasında tədbirlər görməyə çağırıb.
“Bu, eyni zamanda, sülhməramlı qüvvələrinin eyni üçtərəfli razılaşmaya əsasən Laçın dəhlizinə nəzarət etdiyi Rusiyanın məsuliyyətini də vurğulayır”, – Papadakis açıqlamasında bildirib.
Aİ diplomatiyasının rəhbəri Cozep Borel də məlumat verib ki, Ermənistan-Azərbaycan münaqişəsinin nəticələrinin aradan qaldırılması üçün 2022-ci ildə Aİ-nin humanitar maliyyələşdirməsi çərçivəsində 3,6 milyon avro toplanıb. Qeyd olunan məbləğ Laçın dəhlizi ilə hərəkət edə bilən yeganə beynəlxalq humanitar təşkilat olan Beynəlxalq Qızıl Xaç Komitəsinə köçürülüb.
Həmçinin qeyd olunur ki, 2020-ci il münaqişəsindən sonra Aİ hərbi əməliyyatlardan zərər çəkmiş həssas əhaliyə dəstək üçün 27 milyon avroya yaxın vəsait ayırıb.
