Aİİ ölkələrinə qarşı tətbiq edilən sanksiyalar Ermənistan üçün fantastik imkanlar yaradır. Bu haqda jurnalistin sualına cavab olaraq Ermənistanın keçmiş Baş naziri, AİB İdarə Heyətinin sədr müavini, Rəqəmsal Təşəbbüslər Fondunun koordinatoru Tiqran Sarkisyan deyib.
Sarkisyan vurğulayıb ki, sanksiyalar ikiqat effekt verir, lakin Ermənistan 2 ildir ki, ondan çoxlu gəlir əldə edir. Sarkisyanın sözlərinə görə, iqtisadi artım hətta dövlətin proqnozlaşdırdığından da yüksəkdir.
“Ermənistan üçün fantastik imkanlar yaradılıb, çünki kapital axını var, ölkəmizdə yüzlərlə İT şirkəti yaradılıb, burada Aİİ regionundan mütəxəssislər çalışır. Onların yaratdığı məhsul bütün Avrasiya iqtisadiyyat məkanı üçündür”- deyə o, əlavə edib.
O, ABŞ Dövlət Departamenti nümayəndəsinin Ermənistan, Qazaxıstan, Türkiyə və daha 2 ölkənin Rusiya sanksiyalarından yan keçməsi ilə bağlı müşahidəsinə də toxunub.
AİB Heyətinin sədr müavini bununla bağlı risklərin olduğunu, Qərbin Ermənistana təzyiqlərini artıra biləcəyini vurğulayıb. Sarkisyan İrana qarşı sanksiyaların tətbiqi zamanı da risklərin və təzyiqlərin olduğunu vurğulayıb.
O, əmin edib ki, Ermənistanın hazırkı hökuməti bu gün də riskləri azaltmaq üçün onun Baş nazirliyi dövründə istifadə edilmiş mexanizmlərdən istifadə edir, çünki bu, Ermənistanın maraqlarına uyğundur.
“Ermənistan yaradılan vəziyyətdən maksimum yararlanmaq üçün hər şeyi etməlidir və bunu edir. Sanksiya tətbiq edən ölkələrlə münasibətlərdə olmaq lazımdır ki, Ermənistan başqa dövlətlərin deyil, öz maraqlarından çıxış edir” – deyərək Sarkisyan bildirib.
