France 24 yazır: Neftlə zəngin ölkənin əsas müxalifət partiyaları AXCP-dən Əli Kərimlinin “demokratiya imitasiyası” adlandırdığı səsverməni boykot edib. Yarışda iştirak edən digər altı namizəd az tanınırdı və Əliyevi böyük dövlət xadimi və ali baş komandan kimi tərifləyirdilər. Qafqaz Strateji Araşdırmalar Mərkəzinin müstəqil analitiki Gia Nodia bildirib ki, Əliyevin qələbəsi əvvəlcədən bilinən bir nəticə idi. Bu seçkilərdə heç bir rəqabət əlaməti olmayıb. Azərbaycan hakimiyyəti son aylarda müstəqil mediaya təzyiqləri gücləndirərək yüksək səviyyəli rüşvətxorluğu ifşa edən bir neçə tənqidçi jurnalisti həbs edib.
ABC News yazır: Azərbaycanın iki əsas müxalifət partiyası “Müsavat” və “Azərbaycan Xalq Cəbhəsi” səsvermədə iştirak etməyib və bəzi müxalifət üzvləri çərşənbə günü keçirilən səsvermənin saxtalaşdırıla biləcəyini bildiriblər. “Müsavat”ın lideri Arif Hacılı Associated Press-ə bildirib ki, partiya qeyri-demokratik olduğuna görə seçkilərdə iştirak etməyəcək. Xalq Cəbhəsinin lideri Əli Kərimli bildirib ki, ictimai müzakirəsiz növbədənkənar seçkilərin keçirilməsinə çağırış hakimiyyətin siyasi rəqabətdən qorxduğunu göstərir.
“Politico” yazır: “Freedom House”un məlumatına görə, Azərbaycan dünyanın ən az azad ölkələri sırasındadır və “1990-cı illərin əvvəllərindən bəri seçkilər beynəlxalq müşahidəçilər tərəfindən etibarlı və ya rəqabətli hesab edilmir”. Səsvermədən əvvəl ən azı 13 müstəqil jurnalist saxlanılıb və həbs dalğaları müxalifət xadimlərini və tənqidi akademikləri həbsxanaya göndərib. Bu həftənin əvvəlində Beynəlxalq Amnistiya Təşkilatı Azərbaycanda “vətəndaş cəmiyyətinə və qanunun aliliyinə qarşı geniş yayılmış və əlaqələndirilmiş hücum” barədə xəbərdarlıq edib. Ölkədəki müxalifət fəalları seçki məntəqələrinin işçiləri ilə seçki müşahidəçiləri, eləcə də bir neçə dəfə səs verdiyi iddia edilən insanlar arasında mübahisələrin yoxlanılmamış videolarını yayıblar.
Associated Press yazır: Əliyevin seçilə biləcəyi müddətlərin sayında heç bir məhdudiyyət yoxdur və və altı digər namizəddən heç bir real etiraz olmadı. Əliyevin hakimiyyətdə olduğu dövr siyasi debatları məhdudlaşdıran getdikcə daha sərt qanunların qəbulu, müxalifət xadimlərinin və müstəqil jurnalistlərin, o cümlədən prezident seçkiləri ərəfəsində həbsləri ilə yadda qalıb.
Eurasianet yazır: Azərbaycanda prezident seçkiləri tamamilə proqnozlaşdırıla bilən nəticəyə – hazırkı prezident İlham Əliyevin bir qrup saxta rəqib üzərində parlaq qələbəsinə səbəb olmalıdır. Proqnozlara görə, onlarla seçki məntəqəsində eyni köhnə üsullarla saxtakarlıq halları geniş yayılmışdı. Belə üsullardan biri karusel səsverməsidir: eyni seçicilərə bir neçə seçki məntəqəsində səs verməyə icazə verilir. Bugünkü görüntülərdə eyni adamların paytaxt Bakıda müxtəlif seçki məntəqələrinə gəlib səs verməsi əks olunub. Digər üsul – seçki bülletenlərinin doldurulması isə müşahidə kameraları vasitəsilə qeydə alınıb. İki kadrda məntəqə seçki komissiyalarının üzvlərinin bir neçə seçki bülletenini qutulara doldurması göstərilir. Seçki məntəqələrində quraşdırılan kameralar əhalinin Mərkəzi Seçki Komissiyasının (MSK) internet səhifəsində seçkiləri izləmək imkanı yaratmaq məqsədi daşıyır. Lakin onlar ölkə üzrə 6300 seçki məntəqəsindən yalnız 1000-ə yaxınında quraşdırılıb. Yerdə olan jurnalistlər də seçki məntəqələrində və ətrafında internetlə bağlı problemlərin olduğunu bildiriblər.
