19 aprel tarixli Ermənistan-Azərbaycan razılaşmasının alternativi Azərbaycanın lokal hərəkəti idi və ciddi müqavimət olarsa və hesab edirəm ki, bu, ciddi olardı, böyük müharibəyə çevrilərdi. Bunu Faktor TV-yə müsahibəsində şərqşünas və regional məsələlər üzrə ekspert Armen Petrosyan demarkasiyanın Tavuşdan başlanması ilə bağlı Yerevanla Bakı arasında əldə olunan razılığa toxunaraq deyib.
Tavuşda və respublikanın digər yerlərində günlərlə keçirilən etiraz aksiyalarına və Yerevana yürüşə toxunan Armen Petrosyan bunları geosiyasi proseslər prizmasından qiymətləndirir.
Onun sözlərinə görə, Rusiya regionda öz mövqelərini bərpa etmək və möhkəmləndirmək üçün qətiyyətli addımlar atır.
Armen Petrosyan onu da diqqətə çatdırır ki, Azərbaycan prezidenti İlham Əliyev son razılaşmadan sonra da Ermənistana daxili qanunvericiliyi dəyişdirmək, kommunikasiyaları açmaq üçün ilkin şərtlər qoymağa davam edir, həmçinin Alma-Ata bəyannaməsi əsasında Ermənistanla sərhədin delimitasiyası barədə birmənalı danışmır.
O, Rusiyanın Alma-Ata bəyannaməsinə qarşı olduğunu, Moskvanın Bakının əli ilə hərəkət etdiyini düşünür.
Armen Petrosyanın sözlərinə görə, Tavuş kəndləri mövzusu yaxın günlərdə unudulacaq və Ermənistanda hakimiyyətin olub-olmayacağı, hakimiyyət dəyişikliyi məsələsi gündəmdə olacaq və bu, artıq xarici aktorların rəqabəti müstəvisindədir.
