Ermənistan Mərkəzi Bankı 2024-cü ilin sonunda inflyasiyanın 1,5-1,7 faiz aralığında olacağını proqnozlaşdırır. Bu barədə Mərkəzi Bankın prezidenti Martin Qalstyan bildirib.
“2024-cü ilin ötən 5 ayı ərzində Ermənistanda aşağı inflyasiya mühiti qorunub. 2024-cü ilin may ayında 12 aylıq inflyasiya 0,3 faiz təşkil edib, bu da bizim ortamüddətli hədəf indeksimizdən xeyli aşağıdır”.
Mərkəzi Bankının prezidenti bunu əsasən xarici sektordan ötürülən deflyasiya təsirləri ilə əlaqələndirib. Xaricdən gətirilən ərzaq məhsullarının qiyməti aşağı düşüb.
12 aylıq əsas inflyasiya hələ də mənfi ərazidədir. O qeyd edib ki, xarici turizmlə bağlı xidmətlərin, o cümlədən hava nəqliyyatı və beynəlxalq istirahət xidmətlərinin inflyasiyası yüksək səviyyədə qalmaqda davam edir.
“Pul siyasəti proqramında təqdim olunan ssenarilərə əsasən, 2024-cü ilin qısamüddətli üfüqündə inflyasiya hədəf səviyyəsindən aşağı qalacaq. İlin sonunda inflyasiya 1,5-1,7 faiz intervalında olacaq”, – Mərkəzi Bankın prezidenti bildirib.
