Hazırda Ermənistanın Aİ-yə üzvlüyü üçün imzatoplamasının təşkilinə hazırlıq gedir və bu, bir neçə günə başa çatacaq.
Bunu “Demokratik Qüvvələrin Platforması” təşəbbüsünün üzvü, “Respublika Naminə” Partiyasının vitse-prezidenti Ruben Mehrabyan Factor.am ilə söhbətdə bildirib. Onun sözlərinə görə, hazırlıq işləri başa çatdıqdan sonra imzatoplamaya başlanacaq və bu barədə ictimaiyyətə məlumat veriləcək.
Mehrabyanın sözlərinə görə, imzaların toplanması avqustun ortalarında başlayacaq. “Demokratik Qüvvələrin Platforması” təşəbbüsünün üzvü imzatoplama zamanı rayonlara baş çəkməyi planlaşdırdıqlarını da bildirib. Əgər 50 min ER vətəndaşının imzası toplansa, o zaman ER Konstitusiyasına görə, məsələ parlamentin gündəliyinə çıxarılacaq.
“Hesab edirik ki, vətəndaşlarımızın böyük əksəriyyəti həmin ideyanın daşıyıcılarıdır. Belə desək, o imzaların toplanması texniki məsələ olacaq. Bizim hakimiyyət orqanları da bu məsələdə həmfikir, ya da biz onlarla razılaşırıq”, – Ruben Mehrabyan bildirib.
Bundan əvvəl “Demokratik Qüvvələrin Platforması” Ermənistanın Aİ-yə üzvlük referendumu məsələsi ilə bağlı imzatoplama təşkil etmək niyyətində olduğunu açıqlamışdı.
Xatırladaq ki, iyunun 21-də demokratik qüvvələrin təşəbbüsü ilə Ermənistanın Aİ-yə daxil olması ilə bağlı referendumun keçirilməsi məsələsi ilə bağlı parlament dinləmələri də keçirilib.
