Ermənistan Milli Olimpiya Komitəsinin prezidenti Qaqik Tsarukyan öz Facebook səhifəsində Ermənistanın Paris Olimpiya Oyunlarında iştirakını və nəticələrinə toxunub.
“Paris Olimpiya Oyunları başa çatıb.
Dünya təxminən iki həftə Parisdə yaşadı. Bu, xalqların və dövlətlərin dinc rəqabəti üçün gözəl platforma idi və kiçik Ermənistanımız özünü ləyaqətlə təqdim etdi və dünyanın ən güclüləri ilə bərabər yarışdı.
Təəssüf ki, Paris-2024 dünyada gərginlik, insan faciələri, aramsız müharibələr, haqsız yerə Bakı həbsxanalarında saxlanılan soydaşlarımız şəraitində keçdi. Mən həmişə bu fakta diqqət çəkməyə çalışmışam. Təəssüf ki, müxtəlif ölkələrdən bir çox güclü idmançılar qeyri-idman səbəblərindən bu gözəl tədbirdə iştirak edə bilmədilər.
Təəssüf ki, bir çox idmançılara, o cümlədən Ermənistanı təmsil edənlərə təsir edən nəzərəçarpacaq hakim haqsızlıqları oldu. Buna baxmayaraq, Paris-2024 yaxşı təşkil olunmuş, parlaq tədbir idi.
Mən bütün idmançılarımıza, məşqçilərimizə, nümayəndə heyətimizin bütün üzvlərinə təşəkkür etmək istəyirəm. Çox böyük iş görüldü, bu da adətən idmansevərlərin və ictimaiyyətin diqqətindən yayınmır.
Bu ağır günlərdə xalqımıza sevinc və qürur hissi yaşatdıqları üçün idmançılarımıza təşəkkür edirik. Xalqımızın buna çox ehtiyacı var idi və siz bunu şərəflə etdiniz.
Səmimi, ləyaqətli, əziz idmansevərlərimizə təşəkkür etmək istəyirəm. Dünyanın hər yerindən gələn ermənilərin ruhu Parisdə hiss olunurdu, idmançılara, komandaya güc verirdi.
Mən Fransa və Parisin erməni icmalarına xüsusi təşəkkürümü bildirmək istəyirəm. Bütün Olimpiada boyu onlar bizimlə idilər, idman zallarında olurdular, öz varlıqları və istənilən işdə köməklik göstərməyə hazır olduqları ilə idmançıları sevindirirdilər.
Erməni birliyinin, Ermənistan-diaspor birliyinin ən gözəl təzahürlərinin Olimpiya Oyunları zamanı şahidi olduq və idmançılarımızın sayəsində iki həftəyə yaxın birləşdik, ümumi məqsədlər, ümumi arzularla yaşadıq.
İdman nəticələrə gəlincə, əlbəttə ki, biz hamımız ən yaxşısını gözləyirdik və istəyirdik. Amma real həyat həmişə olduğu kimi öz düzəlişlərini edir. 3 gümüş, 1 bürünc medalımız var idi və daha çox qazana biləcəyimiz hər kəsə bəlli idi. Bir halda idmanın bəxti gülmədi, başqa bir halda hakimlik qərarları. Bəzi idmançılarımız hələ çox gəncdir, idman karyerasına yeni başlayıblar və hələ bizə ən yaxşı nəticələrini göstərə bilməyiblər.
Qarşıda yeni turnirlər var: dünya və Avropa çempionatları. Çoxları üçün Paris yalnız başlanğıc idi.
Mən xüsusi şəkildə Varazdat Lalayanın çıxışına toxunmaq istəyirəm. O, dünya ağır atletikasının əsl əfsanəsi Laşa Talaxadzeni məğlub etməyə və idmanın yazılmamış qanununa görə, planetin ən güclü insanı olmağa çox yaxın idi. Bu dəfə olmayıb. Hesab edirəm ki, Varazdat sayəsində yeni bir ağır atletika əfsanəmiz olacaq. Bizim vəzifəmiz onu və gənc idmançı nəslini gələcək uğurlar və növbəti olimpiadalar üçün dəstəkləmək və həvəsləndirməkdir.
Mən Qaqik Tsarukyan kimi, Olimpiya Komitəsinin prezidenti kimi bütün idmançılarımıza dəstəyimi bildirirəm və idmansevərləri əmin edirəm ki, Paris Oyunlarının gedişatı və nəticələri komandalarımız tərəfindən davamı üçün mühüm təcrübə kimi istifadə olunacaq. Həyat davam edir və sabahdan Los Angeles-2028-ə hazırlıq başlayır. Biz hər şeyi etməliyik ki, daha güclü dövlət, daha dinc cəmiyyət, daha böyük və güclü Olimpiya komandası olsun”.
