Ermənistan Respublikasının baş naziri Nikol Paşinyan Fransanın Avropa və xarici işlər naziri Stefan Sejurneyin başçılıq etdiyi nümayəndə heyətini qəbul edib.
Ermənistan baş nazirinin Aparatının yaydığı press-relizə görə, Nikol Paşinyan Stefan Sejurnenin başçılıq etdiyi nümayəndə heyətinin Ermənistan Respublikasına səfərini alqışlayıb və Fransa ilə əlaqələrin, o cümlədən təhlükəsizlik və iqtisadiyyat sahəsində daha da inkişaf etdiriləcəyinin vacibliyini vurğulayıb.
“Bizim strategiyamız belədir: biz öz suverenliyimizi, müstəqilliyimizi, dövlətçiliyimizi gücləndirmək və möhkəmləndirmək istəyirik və bu yolla, təbii ki, biz Fransanın dəstəyini yüksək qiymətləndiririk”, – Nikol Paşinyan bildirib.
Baş nazir həmçinin Fransanın Ermənistanın Aİ ilə əlaqələrinin inkişafına dəstək verməyə hazır olduğunu vurğulayıb. Stefan Sejurne səmimi qəbula görə təşəkkür edib, həmçinin Ermənistan-Fransa əməkdaşlığının təhlükəsizlik və iqtisadiyyat sahələrində ardıcıl inkişafının vacibliyini vurğulayıb.
Fransanın Avropa və Xİ naziri deyib: “Fransa Ermənistanın yanındadır və erməni xalqına dəstəyini davam etdirəcək, biz də iki xalqımız arasında münasibətlərin möhkəmlənməsi üçün bütün səyləri göstərmişik”.
Həmsöhbətlər Ermənistan-Fransa münasibətlərinin müxtəlif gündəm məsələlərini müzakirə ediblər. Ermənistan-Avropa İttifaqı əməkdaşlığı ilə bağlı fikir mübadiləsi aparılıb.
Tərəflər viza rejiminin liberallaşdırılması üzrə dialoqun başlanmasını, eləcə də Avropa Sülh Fondu tərəfindən Ermənistan Respublikasına dəstək vermək qərarının qəbulunu vurğulayıblar. Ermənistan-Azərbaycan sülh müqaviləsi ilə bağlı müzakirələrə, eləcə də regionda gedən proseslərə də toxunulub.
