İtaliyalı deputatlar COP29-dan əvvəl erməni əsirləri azad etməyə çağırıblar

Azərbaycanın COP29 iqlim sammitinə ev sahibliyi etməyə hazırlaşdığı bir vaxtda, bir qrup italyan parlamentari erməni əsirlərin azad edilməsinə çağırış edib. Bu barədə Tempi xəbər yayıb.

Bəyanatda deyilir:

İtaliyanın Bakı ilə möhtəşəm ticarət və siyasi əlaqələrə malik olduğunu, energetika sahəsində də səmərəli əməkdaşlıq etdiyini və bunun bizi Azərbaycanın əsas Avropa tərəfdaşları sırasına daxil etdiyini nəzərə alaraq,

İtaliyanın maraqlarına Cənubi Qafqaz regionunun sülh yolu ilə sabitləşməsinin uyğun olduğunu və buna görə Ermənistan və Azərbaycan arasında etimadı artıran və yekun sülh sazişinin imzalanmasını təşviq edən bütün tədbirlərin dəstəklənməli olduğunu nəzərə alaraq,

Son münaqişələrdən sonra müxtəlif səbəblərdən Bakıda 23 erməni hərbi əsirin və digər məhbusların hələ də saxlanıldığını və onların ailələrinin uzun müddətdir vətənə qayıtmaqlarını gözlədiyini qeyd edərək,

Onların azad edilməsinin iki ölkə arasındakı münasibətlərə müsbət təsir göstərəcəyini və bütün regionda, həmçinin COP29 sammitinə müsbət nəticələr gətirəcəyini nəzərə alaraq,

İtaliya Respublikasının aşağıda imzası olan deputat və senatorları hökumətdən xahiş edirlər ki:

– Azərbaycanlı tərəfdaşın məlumatlılığını artıraraq COP29 tədbiri ilə birlikdə, yaxşı niyyət jesti olaraq və İtaliya ilə dostluğun göstəricisi kimi bütün erməni əsirlərin və məhbusların azad olunmasının təmin edilməsi məsələsini gündəmə gətirsin və lazım gələrsə, onların vətənə qayıtması üçün öz vəsaitləri ilə kömək göstərsin;

– İtaliyanın regionda yekun sülh sazişi əldə edilməsinə dair öhdəliyini Ermənistana və Azərbaycana çatdırsın.