Ermənistanın Baş naziri Nikol Paşinyan daha əvvəl yayılan xəbərləri təsdiqləyib ki, Avropa Komissiyasının prezidenti Ursula fon der Leyen yaxın vaxtlarda Ermənistana səfər edəcək.
Xatırladaq ki, daha əvvəl Politico xəbər vermişdi ki, Avropa Komissiyasının prezidenti iyulun əvvəlində Ermənistana səfər planlaşdırır.
Verilən məlumata görə, Hökumət iclasından sonra jurnalistlərlə brifinqdə Ermənistan Respublikasının Baş naziri Nikol Paşinyan Avropa Komissiyasının prezidenti Ursula fon der Leyenin yaxınlaşan Yerevan səfərinin gündəliyində mühüm məsələlərdən birinin erməni kənd təsərrüfatı məhsullarının Avropa Birliyi bazarına çıxışının asanlaşdırılması olacağını bildirib.
“Ermənistanın Xarici İşlər naziri Ararat Mirzoyan bu yaxınlarda Brüsseldə Avropa İttifaqı Xarici İşlər Nazirləri Şurasının iclasında iştirak edib və bunun nəticəsində bu istiqamətdə yeni imkanların yaradılması üçün ilkin şərtlər formalaşıb.
Ehtimal var ki, bu baxımdan Ermənistan müstəsna imkanlara sahib olacaq. Ümid edirəm ki, Avropa Komissiyasının prezidenti ilə müvafiq layihəni yekunlaşdırmağa nail olacağıq və onun İrəvan səfəri zamanı biz bu barədə birgə bəyanat verəcəyik” – deyə Paşinyan qeyd edib.
Regional əməkdaşlığın perspektivlərinə toxunan Baş nazir Ermənistanın TRIPP layihəsi çərçivəsində qaçılmaz olaraq regional proqramlara inteqrasiya olunacağını vurğulayıb.
“Cənubi Qafqaz ölkələrinin regiona ümumi məkan kimi baxmağın vaxtı çatıb, burada çoxsaylı ümumi maraqlar mövcuddur.
Əlbəttə, hər bir ölkənin öz milli maraqları və baxışları var, lakin hesab edirəm ki, bizi kifayət qədər geniş ümumi maraq dairəsi də birləşdirir və bu istiqamətdə işləri davam etdirmək lazımdır” – deyə Baş nazir bildirib.
