ABŞ-ın müvəqqəti işlər vəkili Devid Allen erməni-amerikan tərəfdaşlığı çərçivəsində həyata keçirilən proqramlar və onların genişləndirilməsi imkanları ilə tanış olmaq üçün Syünikə səfər edib.
Alınan məlumata görə, bu barədə Ermənistandakı ABŞ səfirliyinin “Facebook” səhifəsində dərc olunmuş videoda qeyd olunub.
Videoda Devid Allen Ermənistan Respublikasının Sünik vilayətinin Kapan, Qoris və Meğri şəhərlərinə etdiyi səfərə toxunub.
“Bu səfər zamanı erməni-amerikan tərəfdaşlığının təhsildən tutmuş mədəni irsin qorunmasına, enerji əməkdaşlığına və iqtisadi inkişafa qədər bir çox istiqamətləri və sahələri müzakirə olundu.
Birlikdə biz hər iki ölkəmiz üçün daha rifah dolu gələcək qurmağa davam edirik” – deyə Ermənistandakı ABŞ-ın müvəqqəti işlər vəkili qeyd edərək, Sünikdə göstərilən isti qəbula görə təşəkkür edib.
Onun sözlərinə görə, səfər çərçivəsində Kapan, Qoris və Meğridə olub, ABŞ və Ermənistan arasında bu ərazidə genişlənən əməkdaşlıqdan danışıb. İşgüzar görüşlərə başlamazdan əvvəl ABŞ-ın müvəqqəti işlər vəkili Tatev monastır kompleksini, Kapanın “Amerika Mərkəzi”ni ziyarət edib ki, bu da ABŞ-ın müstəqilliyinin 250 illik yubileyinə həsr olunmuş “Təsisçilər Muzeyi” sərgisinin növbəti dayanacağı olub.
“Burada yerli gənclərlə söhbət etmək fürsətimiz də oldu. Meğrinin 2 nömrəli məktəbində ACCESS ingilis dili təlim proqramının iştirakçısı olan şagirdlərlə görüşdüm, ingilis dili biliklərinin onlara gələcək üçün lazım olan inam və bacarıqları əldə etməyə necə kömək etdiyini başa düşdüm.
Mən həmçinin sərhəd bölgəsində olmuş, Dövlət Gəlirləri Komitəsinin və Ermənistan Respublikasının Sərhəd Qüvvələrinin nümayəndələri ilə onların işi və əməkdaşlığımızın gedişi haqqında daha çox məlumat əldə etmək üçün görüşmüşəm” – deyə Devid Allen bildirib.
Qorisdə o, “Contour Global” Amerika şirkətinin ofisini ziyarət edib və burada enerji məsələləri və mümkün əməkdaşlıq müzakirə olunub.
Qorisdə həmçinin “Sülh Korpusu”nun könüllüləri, onları qəbul edən ailələr, FLEX proqramının məzunları və Syünikin müxtəlif icmalarında təşəbbüslər həyata keçirən vətəndaş cəmiyyətinin nümayəndələri ilə görüşlər olub.
“Təbii ki, Sünikdə olarkən Meğrinin Surb Hovhannes kilsəsinə baş çəkməyə bilməzdim ki, orada “ABŞ səfirlərinin mədəni dəyərlərin qorunması fondu”nun dəstəyi ilə işlər aparılıb.
Burada ABŞ Hökumətinin dəstəyi ilə qorunan orta əsr kilsəsini, gözəl divar rəsmlərini gördüm.
Syünikə səfərim Karahunj – tez-tez Erməni Stounhenci adlandırılan abidəni görməsən tam olmazdı” – deyə ABŞ-ın müvəqqəti işlər vəkili sözlərini yekunlaşdırıb.
