Ermənistan-İran tərəfdaşlığını strateji tərəfdaşlıq sənədi çərçivəsində təsis etmək istəyimiz və iradəmiz çox ciddi və qətiyyətlidir. Bu, müxtəlif səviyyələrdə müzakirə olunub və bu barədə açıq bəyanatlar verilib. Bunu İranın Ermənistandakı səfiri Xəlil Şirqulami mətbuat konfransında bildirib.
“Ötən həftə hörmətli Nikol Paşinyan İran İslam Respublikasının hörmətli Prezidenti cənab Pezeşkiani ilə İranda görüşəndə cənab Pezeşkiani bir daha nəticələrin mümkün qədər tez əldə edilməsinin vacibliyini və zəruriliyini vurğuladı. Buna görə də deyə bilərik ki, İran İslam Respublikası da öz növbəsində hərtərəfli strateji tərəfdaşlıq sənədinin imzalanması üçün davamlı və israrlı şəkildə çalışır və addımlar atır və bu yolda qətiyyətlə addımlar atmağa davam edir.
Hazırda Strateji Tərəfdaşlıq Sənədinin mətni üzərində işləyirik və mətn öyrənmə və layihələndirmə mərhələsindədir. Ümid edirəm ki, bu mərhələni mümkün qədər tez başa çatdırıb imzalanması üzərində işə başlayacağıq.
Bu sənədi ümumiləşdirmək və yekunlaşdırmaq üçün mümkün qədər çox çalışmalıyıq. İran İslam Respublikası Ermənistan Respublikasının hörmətli Baş naziri Nikol Paşinyanın İran İslam Respublikasına səfərini məmnuniyyətlə qarşılayacaq və orada bu sənədi imzalaya biləcəklər.
İnanıram ki, bu sənəd Ermənistan-İran münasibətlərində yeni bir atmosfer yaradacaq və gələcək əməkdaşlıq üçün yeni bir pəncərə açacaq.
Bu sənəd müxtəlif sahələrdə – siyasi, təhlükəsizlik, investisiya, iqtisadi və müdafiə sahələrində əməkdaşlığın gələcək istiqamətləri üçün aydın təlimatlar verəcək”, – deyə o bildirib.
