Rusiya təsirini regionda saxlaya bilmək üçün “zəif halqa”ya ehtiyac duyur və Moskva Ermənistanı məhz belə bir halqa hesab edir.
Bu barədə Factor TV-yə verdiyi müsahibədə siyasi analitik, İrəvan Mətbuat Klubunun fəxri sədri Boris Navasardyan bəyan edib.
Onun sözlərinə görə, erməni müxalifəti də Moskvanın Ermənistandakı təsir rıçaqlarından biri olaraq qalır.
O, Rusiya tərəfindən Ermənistana qarşı davam edən iqtisadi məhdudiyyətləri – kənd təsərrüfatı məhsullarının, spirtli içkilərin, mineral suyun və digər malların idxalının qadağan edilməsini parlament seçkilərindən əvvəl başlanmış təzyiqin davamı hesab edir.
Analitikin sözlərinə görə, bu payızda keçiriləcək yerli özünüidarə orqanlarının seçkiləri hazırda bu təzyiqin hədəflərindəndir. Navasardyan qeyd edib ki, Ermənistan və Rusiya arasındakı dərin ixtilaflar təkcə xarici siyasət fikir ayrılıqlarına deyil, həm də iki ölkənin dövlətçilik modellərinin fərqlərinə əsaslanır.
Ermənistan-Azərbaycan tənzimlənməsi ilə bağlı analitik qeyd edib ki, hazırda Azərbaycanla sülh müqaviləsi imzalamaq üçün Ermənistan Konstitusiyasının dəyişdirilməsi ilə bağlı referendum keçirilməsindən başqa heç bir mexanizm görmür.
Eyni zamanda, o, erməni cəmiyyətinin hələlik Konstitusiya islahatlarını həyata keçirməyə hazır olmadığını və mövcud sosial qütbləşmə kontekstində referendumun keçirilməsinin ən yaxşı ideya olmadığını dəyərləndirir.
Navasardyan həmçinin hesab edir ki, Bakı və İrəvan hələ sülh müqaviləsinin bütün 17 bəndini şüurlu şəkildə icra etməyə hazır deyillər.
Onun imzalanması hazırda qeyri-mümkün olduğunu nəzərə alaraq, analitik Ermənistan və Azərbaycana tənzimləmə prosesini davam etdirməyə imkan verəcək aralıq sənədə ehtiyac olduğunu düşünür.
Eyni zamanda, Navasardyan vurğulayıb ki, Ermənistan və Azərbaycan arasında diplomatik münasibətlərin qurulması hətta sülh müqaviləsi imzalanmadan da mümkündür.
İlkin mərhələdə, onun fikrincə, üçüncü ölkələrin diplomatik nümayəndəliklərindən istifadə oluna bilər: məsələn, Qazaxıstanın İrəvandakı səfirliyi Azərbaycanın maraqlarını təmsil edə bilər, Ermənistanın Tbilisidəki səfirliyi isə Azərbaycan tərəfi ilə təmaslara kömək edə bilər.
TRIPP layihəsindən danışarkən Navasardyan qeyd edib ki, ABŞ-ın İranla müharibəsi Vaşinqtonun bu layihənin həyata keçirilməsinə olan marağını azaltmayıb. Analitik həmçinin daxili siyasi vəziyyətə də toxunub.
Onun fikrincə, yerli özünüidarə orqanlarının seçkiləri öncəsi erməni cəmiyyətinin qütbləşməsi həm hakimiyyətə, həm də müxalifətə sərfəlidir.
Navasardyan müxalifətin konstitusiya referendumuna razı ola biləcəyi fikrini də absurd adlandırıb. Analitikin sözlərinə görə, xarici siyasət məsələləri hazırda Ermənistan üçün xüsusilə vacibdir, lakin kəskin daxili siyasi münaqişə ölkənin bu sahədə səmərəli siyasət aparmaq qabiliyyətinə mane olur.
Mənbə factor.am
