ABŞ Konqresi Azərbaycana hərbi yardımı məhdudlaşdıran düzəlişləri nəzərdən keçirəcək

İyulun 20-də ABŞ Konqresi 2021-ci maliyyə ili üçün “Dövlət müdafiəsi haqqında” qanuna 66 və 397 saylı düzəlişləri nəzərdən keçirməyi planlaşdırır.

Qanuna 66 saylı düzəlişin müəllifi konqresmen Bred Şermandır. Konqresmenlər Frenk Pallone, Ceki Şpeyer, Adam Şiff və Terrens Con Koks onu dəstəkləyiblər.

Düzəlişə əsasən, “yalnız əgər prezident belə müdafiə predmetlərinin və ya xidmətlərin verilməsinin mülki aviasiyaya təhlükə yaratmadığını Konqresə təsdiq edərsə, bu qanun layihəsi ilə icazə verilən heç bir vasitədən müdafiə predmetlərinin və ya xidmətlərin Azərbaycana verilməsi üçün istifadə edilə bilməz”.

397 saylı düzəliş Frenk Pallone tərəfindən təqdim olunub. Sənəddə Müdafiə Nazirliyindən ABŞ-ın Azərbaycana müdafiə üçün daha öncə təqdim edilmiş 120 milyon dollardan artıq məbləğdə hərbi yardım proqramı haqda hesabatı Konqresə təqdim etmək tələb olunur. Düzəliş layihəsini konqresmenlər Adam Şiff, Bred Şerman, Ceki Şpeyer dəstəkləyiblər.

Amerika Erməni Milli Komitəsinin (ANCA) icraçı direktoru Aram Ambaryan hesab edir ki, bu düzəlişlər Azərbaycanın qarşısını almağa imkan verəcək.