Ermənistan Respublikasının Xarici İşlər Nazirliyinin mətbuat katibi Vahan Hunanyan Azərbaycanın mədəniyyət naziri Anar Kərimovun bəyanatına münasibət bildirdi.
O qeyd edib ki, Azərbaycanın mədəniyyət naziri Anar Kərimovun fevralın 3-də Azərbaycanın nəzarətində olan ərazilərdə erməni dini, tarixi-mədəni abidələrin kimliyini dəyişmək üçün işçi qrupun yaradılması ilə bağlı bəyanatını qətiyyətlə pisləyirlər.
“Qonşu xalqların tarixi-mədəni irsini qəsdən və qanunsuz olaraq mənimsəmək, onları tarixi yaddaşından məhrum etmək məqsədilə dövlət səviyyəsində belə bir strukturun yaradılması hətta münaqişələr tarixində də görünməmiş bir hadisədir.
Bu, bir daha sübut edir ki, 44 günlük müharibə zamanı və ondan sonrakı dövrdə Dağlıq Qarabağda erməni mədəni və dini irsinə qarşı vandalizm və məhv etmə halları məqsədyönlü və planlı şəkildə həyata keçirilir. Bu da Dağlıq Qarabağın erməni əhalisinin öz doğma yurdundan məhrum edilməsi siyasətinin bir hissəsidir.
Azərbaycan hökumətinin bu addımı 2021-ci ilin dekabrın 7-də BMT-nin Beynəlxalq Ədalət Məhkəməsinin qəbul etdiyi təcili tədbirlər qərarına çağırışdır.
Hazırkı vəziyyətdə beynəlxalq ictimaiyyətin, xüsusən də YUNESKO-nun təcili müdaxiləsi və yerdə maneəsiz iştirakı ümumbəşəri mədəni irsin bir hissəsi olan Artsaxın erməni abidələrinin qorunması, vandalizm hallarının qarşısının alınması üçün daha aktual xarakter alır.
Ermənilərin tarixi-mədəni və dini irsinin məhv edilməsi, şəxsiyyətin təhrif edilməsi siyasəti Azərbaycanın barışıq əldə etmək bəyanatlarına ziddir və regionda davamlı sülhün bərqərar olmasına ciddi maneələr yaradır”- deyə Vahan Hunanyan vurğulayıb.
