Martın 30-da Brüsseldə Ermənistan Təhlükəsizlik Şurasının katibi Armen Grigoryan Azərbaycan prezidentinin köməkçisi Hikmət Hacıyev ilə görüşüb. Görüşü Aİ-nin Cənubi Qafqaz üzrə xüsusi nümayəndəsi Toivo Klaar təşkil edib. Bu barədə Avropa İttifaqının rəsmi saytı məlumat yayıb.
“Avropa İttifaqı iki ölkə arasında bir sıra məsələlərin həlli yollarını tapmaq üçün birgə səyləri irəli sürmək üçün Brüsseldə Ermənistan və Azərbaycanın yüksək səviyyəli rəsmilərinin görüşünü təşkil edib. Xüsusilə, Avropa Şurasının prezidenti Şarl Mişel, Azərbaycan Respublikasının prezidenti İlham Əliyev və Ermənistan Respublikasının Baş naziri Nikol Paşinyanın 2022-ci il aprelin 6-da keçiriləcək görüşünə hazırlıqla bağlı müzakirələr aparılıb”- deyə bəyanatda qeyd olunub.
Aİ-nin məlumatına görə, Grigoryan və Hacıyev arasında ayrı-ayrılıqda ikitərəfli görüşlərin keçirildiyi substantiv müzakirələr zamanı tərəflər 2021-ci il dekabrın 14-də Brüsseldə iki ölkə liderlərinin və Mişel arasında görüşündə əldə olunan qarşılıqlı anlaşmanın davamı olaraq Ermənistan və Azərbaycan arasında bütün problemləri, eləcə də siyasi və təhlükəsizlik vəziyyəti müzakirə edib.
İştirakçılar müzakirələri davam etdirmək üçün növbəti həftələrdə yenidən görüşmək barədə razılığa gəliblər. “Ermənistan və Azərbaycan iki ölkə arasında sülh sazişinin perspektivləri ilə bağlı məsələlərə də toxunacaq. Avropa İttifaqı Cənubi Qafqazda davamlı sülh və sabitlik naminə fəaliyyətini davam etdirməyə sadiqdir”-deyə bəyanatda vurğulanıb.
