ER Xarici işlər naziri Ararat Mirzoyan ABŞ-ın dövlət katibi Entoni Blinkenlə görüşüb, ER-ABŞ strateji dialoqunun başlandığını elan edib.Bu haqda ER XİN-I məlumatlandırıb.
Hər iki nümayəndə heyəti Dağlıq Qarabağ münaqişəsinin sülh yolu ilə həllinə yardım etmək mandatı olan ATƏT-in Minsk Qrupunun həmsədri kimi ABŞ-ın rolunu vurğulayaraq sərhəd təhlükəsizliyi məsələlərini müzakirə ediblər.
Qeyd olunur ki, dialoq zamanı Ermənistan və ABŞ ikitərəfli münasibətlərin bütün istiqamətlərdə möhkəmləndirilməsinə sadiq olduqlarını bir daha təsdiq ediblər.
Dövlət katibinin Avropa və Avrasiya məsələləri üzrə müavini Karen Donfrid bir daha təsdiqləyib ki, Birləşmiş Ştatlar məsuliyyətli demokratik və iqtisadi institutların qurulmasında Ermənistan hökuməti ilə güclü dəstəyini və əməkdaşlığı davam etdirəcək.
Əsas müzakirə mövzuları arasında iqtisadi sahədə qarşılıqlı rifahın təşviqi mexanizmləri, o cümlədən enerji sahəsində əməkdaşlıq və ikitərəfli ticarət və investisiya əlaqələrinin təşviqi və dərinləşdirilməsi üçün işçi qüvvəsinin inkişafı olub.
Nazir Mirzoyan və Ermənistan nümayəndə heyəti USAİD-in icraçı direktoru Samanta Pauer, dövlət katibinin siyasi məsələlər üzrə müavini Viktoriya Nuland və başqaları ilə də konstruktiv görüşlər keçirib.
Nümayəndə heyətinin üzvləri Vaşinqtonda bir sıra sənədlər, o cümlədən mülki nüvə enerjisi sahəsində əməkdaşlıq haqqında saziş imzalayıblar.
Ermənistan və Birləşmiş Ştatlar həmçinin korrupsiyaya qarşı mübarizə və hüquq-mühafizə orqanlarında islahatlar üçün iki birgə fəaliyyət planını imzalayıb.
