Artsax Parlamentinin fraksiyaları DXR, LXR, Xerson və Zaporojya vilayətlərinin Rusiya Federasiyasına birləşdirilməsi barədə bəyanatla çıxış ediblər.
Bəyanatda deyilir:
“Donetsk Xalq Respublikasının və Luqansk Xalq Respublikasının müstəqilliyinin Rusiya Federasiyası tərəfindən tanınmasını və ondan sonrakı 2022-ci il sentyabrın 30-da yuxarıda adı çəkilən ərazilərin, Xerson və Zaporojye vilayətlərinin Rusiya Federasiyasına birləşdirilməsini nəzərə alaraq, Artsax Respublikasının Parlamentinin fraksiyaları qeyd edir ki, 1991-ci ildə Dağlıq Qarabağ Respublikası hüquqi nöqteyi-nəzərdən beynəlxalq hüquq normalarına, demokratiya prinsiplərinə və o dövrdə qüvvədə olan SSRİ qanunvericiliyinə uyğun olaraq öz müqəddəratını təyin etmək hüququndan mükəmməl şəkildə istifadə edib.
Beynəlxalq cəmiyyət Azərbaycanı SSRİ-nin daxili qanunvericiliyi ilə müəyyən edilmiş hüdudlarda müstəqil dövlət kimi tanıdı. Həmin qanunvericiliyə görə, Azərbaycan müstəqillik əldə etdiyi zaman Dağlıq Qarabağın bu ölkə ilə heç bir əlaqəsi yox idi, əks halda o, Birləşmiş Millətlər Təşkilatına daxil olmazdı, ona görə də Azərbaycanın ərazi bütövlüyünün Dağlıq Qarabağ Respublikası ilə heç bir aidiyyəti yoxdur.
BMT Nizamnaməsinin 1-ci maddəsində qeyd edilmiş xalqların bərabərliyi və öz müqəddəratını təyinetmə prinsipini və Beynəlxalq Ədalət Məhkəməsinin 2010-cu il 22 iyul hökmünü (ki, buna görə beynəlxalq hüquq Kosovoda olduğu kimi müstəqilliyin elanını qadağan etmir) qəbul edərək, Artsax Parlamentinin fraksiyaları ATƏT-in Minsk Qrupunun həmsədr ölkələrini – Rusiya Federasiyası, Amerika Birləşmiş Ştatları, Fransa və Birləşmiş Millətlər Təşkilatının digər 190 üzv dövlətini, əhalinin üzləşdiyi ən ciddi həyati təhlükələri aradan qaldıraraq, Dağlıq Qarabağ Respublikasını tanımağa çağırır.
Bu bəyanat Artsaxın “Azad Vətən-VBA”, “Vahid Vətən”, “Ədalət”, “Erməni İnqilabi Daşnaktsutyun”, “Artsax Demokratik Partiyası” fraksiyaları adından verilib.
