Beynəlxalq Ədalət Məhkəməsinin fevralın 22-də dərc olunmuş qərarına baxmayaraq, Azərbaycan Dağlıq Qarabağı Ermənistanla birləşdirən Laçın dəhlizinin yeganə keçilə bilən asfaltlanmış yolunu qanunsuz olaraq bağlamaqda davam edir. Bunu ER baş naziri Nikol Paşinyan hökumətin iclasında deyib.
“Bunun nəticəsində Dağlıq Qarabağda humanitar vəziyyət gərgin olmaqda davam edir. Eyni zamanda, biz Azərbaycanın Dağlıq Qarabağla təmas xəttində vəziyyəti hərbi yolla gərginləşdirməyə yönəlmiş konkret hərəkətlərini görürük”, – deyə Paşinyan bildirib.
Baş nazirin sözlərinə görə, bunun son təzahürü martın 5-də Dağlıq Qarabağ Polisinin 3 əməkdaşının Azərbaycanın təxribatçı qrupu tərəfindən öldürülməsi olub.
“Xatırladaq ki, polis əməkdaşları xidmət məqsədilə DQ-nin Hin Şen və Mets Şen kəndlərinə gedirdi.
Daha bir insident Dağlıq Qarabağda Rusiya sülhməramlı qoşunlarının cavabdeh olduğu ərazidə baş verib.
Qeyd etmək lazımdır ki, Rusiya Federasiyası Müdafiə Nazirliyi martın 6-da yaydığı məlumatda insidentin təşəbbüskarının Azərbaycan tərəfi olduğunu açıq şəkildə qeyd edib. RF MN mesajında o da bildirilir ki, hadisənin təfərrüatlarını öyrənmək üçün Dağlıq Qarabağ və Azərbaycan nümayəndələrinin iştirakı ilə prosedur aparılır.
Bu baxımdan hesab edirəm ki, DQ polis əməkdaşlarının öldürülməsinin Laçın dəhlizində baş verməsi faktına xüsusi diqqət yetirilməlidir.
Xatırladığınız kimi, 9 noyabr 2020-ci il tarixli üçtərəfli bəyanatın 6-cı bəndinə əsasən, Laçın dəhlizi təkcə Azərbaycanın 2022-ci il dekabrın 12-dən bağladığı yol deyil, həm də eni 5 km olan ərazi, təhlükəsizlik zolağıdır.
Ona görə də martın 5-də Azərbaycanın həyata keçirdiyi qətllər 9 noyabr 2020-ci il tarixli üçtərəfli bəyanatın üç dəfə pozulması deməkdir. Nəinki atəşkəs, nəinki DQ-nin təmas xətti, hətta Laçın dəhlizinin 5 kilometrlik zonası da pozulub”, – deyə Paşinyan bildirib.
