Martın 21-də Axalkalakda “Zori Zoryan” gənclər və Cavaxk gənclər birliyinin üzvləri Artsax və Artsax ermənilərinə dəstək yürüşü keçiriblər. Jnews xəbər verir ki, “Zori Zoryan” birliyinin üzvləri Gürcüstan parlamentinin erməni deputatı Samvel Manukyana da məktub göndəriblər.
Yürüş iştirakçıları Ermənistan və gürcü bayraqları, üzərində “Artsaxın həyat yolunu açın”, “Artsax, biz sizin yanınızdayıq”, “Artsax, 100 gün blokadada”, sözləri yazılmış plakatlarla Gənclər Mərkəzindən yola düşüblər.
Gürcüstan parlamentinin erməni deputatı Samvel Manukyana ünvanlanan məktubda deyilir:
“Artsaxda humanitar fəlakət baş verib. Dövlətlərin öz maraqları naminə siyasi alverlə məşğul olduğu indiki mürəkkəb geosiyasi şəraitdə hətta Haaqa Beynəlxalq Məhkəməsinin bu ilin 22 fevral tarixli qərarına da məhəl qoyulmur.
Təəssüflər olsun ki, Azərbaycanın bu qərara ümumiyyətlə məhəl qoymadığı, dövlətlərin, beynəlxalq təşkilatların Azərbaycana təzyiq etməkdən imtina etdiyi bir reallıqla üz-üzəyik.
Cənab Manukyan, Gürcüstanla Azərbaycanın qonşuluq münasibətlərinin olduğunu nəzərə alaraq, yuxarıda qeyd olunan məsələni bizim ölkəmiz Gürcüstan hökuməti qarşısında və imkan daxilində qaldırmağınızı xahiş edirik ki, Azərbaycanla danışıqlar və vasitəçilik yolu ilə 2021-ci ildə olduğu kimi humanitar fəlakətin qarşısı alınsın .
Artsax və Artsax ermənilərini dəstəkləyən aksiya iştirakçıları Axalkalakın Müqəddəs Xaç kilsəsinin həyətində Artsax heç vaxt Azərbaycanın bir hissəsi olmayacaq şüarları səsləndiriblər.
