Martın 29-da baş nazir Nikol Paşinyan Demokratiya Uğrunda İkinci Sammitin plenar iclasında iştirak edib. Sammit Amerika Birləşmiş Ştatlarının prezidenti Co Baydenin təşəbbüsü ilə onlayn formatda keçirilib.
Ermənistan hökumətindən “Armenpress”ə verilən məlumata görə, Demokratiya Uğrunda İkinci Sammitin plenar iclasının sonunda Ermənistan Respublikasının qeyd-şərtlə qoşulduğu Bəyannamə qəbul edilib.
Ermənistan Respublikası aşağıdakı bənddən bitərəf qalır։
“Biz azadlıq və demokratiya dəyərlərinə sadiq olan və onların birbaşa və ya dolayı yolla pozmaq cəhdləri və ya təhdidlərinə qarşı çıxan dünya ölkələrini və xalqlarını dəstəkləmək əzmində olduğumuzu bir daha təsdiqləyirik. Biz Birləşmiş Millətlər Təşkilatının Nizamnaməsinin əsas prinsiplərini qəbul edirik ki, ona görə də bütün dövlətlər öz beynəlxalq münasibətlərində hər hansı dövlətin ərazi bütövlüyünə və ya siyasi müstəqilliyinə qarşı güc tətbiq etməklə hədələməkdən və ya güc tətbiq etməkdən çəkinməli və beynəlxalq mübahisələrini sülh yolu ilə həll etməlidirlər. Biz Birləşmiş Millətlər Təşkilatının Nizamnaməsinin 51-ci maddəsinə əsasən dövlətlərin fərdi və ya kollektiv özünümüdafiə üçün ayrılmaz hüququnu tanıyırıq.
Biz Ukraynada BMT Nizamnaməsinin prinsiplərinə uyğun olaraq hərtərəfli, ədalətli və davamlı sülhün mümkün qədər tez əldə edilməsinin zəruriliyini vurğulayırıq. Biz Rusiya Federasiyasının Ukraynaya qarşı təcavüzünün dəhşətli insan hüquqları və humanitar nəticələrini, o cümlədən Ukraynanın hər yerində kritik infrastruktura qarşı davam edən hücumları və mülki əhali üçün dağıdıcı nəticələrini təəssüflə bildiririk, qadın və uşaqlar da daxil olmaqla mülki əhalinin itkilərinin çoxluğundan, humanitar yardıma ehtiyacı olan məcburi köçkünlərin və qaçqınların sayından, uşaqlara qarşı pozuntu və zorakılıqlardan dərin narahatlığımızı bildiririk. Biz müharibənin qlobal ərzaq təhlükəsizliyinə, enerjiyə, nüvə təhlükəsizliyinə və ətraf mühitə mənfi təsirindən dərin narahatıq. Biz Rusiyadan beynəlxalq səviyyədə tanınmış sərhədlər boyunca Ukrayna ərazisindən bütün hərbi qüvvələrini dərhal, tamamilə və qeyd-şərtsiz çıxarmasını tələb edirik və hərbi əməliyyatları dayandırmağa çağırırıq. Biz həmçinin silahlı münaqişə tərəflərini beynəlxalq hüquq, o cümlədən beynəlxalq humanitar hüquq çərçivəsində götürdükləri öhdəliklərə əməl etməyə çağırırıq. Biz həmçinin hərbi əsirlərin tam qaytarılmasına, qeyri-qanuni saxlanılanların hamısının azad edilməsinə və bütün məcburi köçürülmüş və deportasiya edilmiş mülki şəxslərin, o cümlədən uşaqlara qaytarılmasına çağırırıq. Biz Ukrayna ərazisində beynəlxalq hüquq çərçivəsində ağır cinayətlərin milli və ya beynəlxalq səviyyədə düzgün, ədalətli və müstəqil araşdırmalar vasitəsilə təqibini, eləcə də bütün qurbanlar üçün ədalətin təmin edilməsini və gələcək cinayətlərin qarşısının alınmasını qətiyyətlə dəstəkləyirik”.
Bu bənd bütün münaqişələri və böhranları əhatəli və tam şəkildə əks etdirmir və Azərbaycanın Ermənistan Respublikasının suveren ərazisinə qarşı təcavüzü və Ermənistanın suveren ərazisinin müəyyən hissələrinin işğalı faktına toxunmur.
