Ermənistan özünü regional rəqəmsallaşma mərkəzi və maliyyə texnologiyalarının əsas mərkəzi kimi göstərə bilər. “Armenpress”in məlumatına görə, bu barədə aprelin 5-də “Rəqəmsal gələcəyin kəşfi” adlı birinci Doing Digital Forumunda jurnalistlərə rəqəmsal transformasiya və fintek üzrə beynəlxalq ekspert Kris Skinner bildirib. Onun sözlərinə görə, dünyanın necə rəqəmsallaşdığını və transformasiya olunduğunu anlamaq son dərəcə vacibdir və bu transformasiya və rəqəmsallaşma anlayışını Ermənistana çatdırmaq çox vacibdir.
“Bunun iki səbəbi var. Birincisi, bu regiondakı ölkələr rəqəmsallaşma və transformasiya ilə məşğul olmasalar, iqtisadiyyatda rəqabət üstünlüklərini itirəcək və regionun digər ölkələrindən geri qalacaqlar. İkincisi, region ölkələri arasında Ermənistan özünü regional rəqəmsallaşma mərkəzi və fintek-in əsas mərkəzi kimi göstərə bilər”, – deyə o bildirib.
Skinner bankların və ölkə rəhbərliyinin transformasiyanın həyata keçirilməsində liderlik etməsini son dərəcə vacib hesab edib.
“Əgər maliyyə qurumunun rəhbərliyi bunu anlamırsa, deməli, belə olmayacaq. Rəqəmsal transformasiya məsələsində təkcə bank rəhbərliyi deyil, həm də ölkə rəhbərliyi liderlik etməlidir: baş nazir, baş nazirin müavini, Mərkəzi Bankın sədri. Ermənistanın rəqəmsal transformasiyanın regional mərkəzinə çevrilməsi üçün dövlət rəhbərliyinin də bunu başa düşməsi və önə keçməsi lazımdır. Baş nazirin müavininin və Mərkəzi Bankın sədrinin bu forumda təmsil olunması onu göstərir ki, ölkə rəhbərliyində bu təsəvvür var və bu rəqəmsal transformasiyanın baş tutması üçün öhdəlik götürülüb”.
