ER baş naziri Nikol Paşinyanın sözlərinə görə, Ermənistan bütün beynəlxalq münasibətlərində Ermənistan Respublikasının 29 min 800 kvadrat kilometr ərazini, daha dəqiq desək, Ermənistan SSR ərazisini tanıdığını aydın şəkildə qeydə alsaq, sülh mümkündür.
“Armenpress” xəbər verir ki, baş nazir bunu Parlamentdə “Ermənistan Respublikası hökumətinin 2022-ci il üçün planının (2021-2026-cı illər) icrasının gedişi və nəticələri haqqında” hesabatın təqdimatında deyib.
“Bütün beynəlxalq münasibətlərimizdə 29 min 800 kvadrat kilometr ərazini Ermənistan kimi tanıdığımızı, daha dəqiq desək, Ermənistan SSR-in ərazisini təkcə bu gün üçün deyil, həm də gələcək üçün açıq şəkildə qeydə alsaq, sülh mümkündür. Bizim heç bir başqa ölkədən hər hansı ərazi tələbimiz yoxdur, heç vaxt da olmayacaq”, – deyə Paşinyan bildirib.
Baş nazirin sözlərinə görə, bu ideyanı qeydə almasaq, onu ictimaiyyətin sosial-psixologiyasına çevirməsək, heç kim Ermənistanın inkişafına imkan verməyəcək, çünki Ermənistanın inkişaf etməsi və güclənməsi fikrini heç kim qəbul etməyəcək.
“Bundan başqa, belə olan halda nəinki bizim inkişafımıza imkan verməmək başqalarının gündəminin problemi olacaq, heç olmasa dövlətimizin varlığına imkan verməmək başqalarının gündəminin probleminə çevriləcək. Və bu vəziyyətdə bizə heç kim kömək etməyəcək”, – deyə Paşinyan bildirib.
O, vurğulayıb ki, hökumətin inkişaf gündəliyinin strateji məqsədi ölkənin təhlükəsizliyi və rifahını qarşıya məqsəd kimi qoyaraq, regional mühitlə harmonik və dinc yaşaması olmalıdır. Paşinyan qeyd edib ki, başqaları da eyni strategiyanı qəbul etsə, bu mümkün olacaq, amma bunu ilk növbədə Ermənistan edə bilər. Baş nazir vurğulayıb ki, bu, Ermənistanın tarixini unutmaq demək deyil, bu, tarixə baxışın, sosial-psixoloji qavrayışın perspektivini dəyişmək deməkdir.
