Ermənistan müdafiə nazirinin müavini Arman Sargsyan Ermənistan və Çexiya arasında hərbi-texniki əməkdaşlıq haqqında sazişi Parlamentin müdafiə və təhlükəsizlik məsələləri üzrə daimi komissiyasına təqdim edib.
“Həmin razılaşmaya əsasən, hərbi-texniki sahədə əməkdaşlığın istiqamətləri müəyyən ediləcək. Bunlara hərbi təyinatlı məhsulların istehsalı, idxalı və ixracı prosesi, lisenziyalaşdırma, keyfiyyətə nəzarət, zəruri mütəxəssislərin və texniki kadrların hazırlanması, hərbi-texniki sahədə fəaliyyət göstərən təşkilatlara dəstək, informasiya mübadiləsi və saxlanması ilə bağlı digər əlaqələr daxildir.
Arman Sargsyan qeyd edib ki, saziş layihəsi maraqlı dövlət orqanları ilə razılaşdırılmaqla yanaşı, Konstitusiya Məhkəməsi tərəfindən də Konstitusiyanın tələblərinə uyğun olaraq tanınıb.
Xatırladaq ki, Ermənistan və Çexiya hərbi-texniki əməkdaşlıq haqqında sazişi 2019-cu ilin aprelində imzalayıblar. Saziş hər iki ölkədə daxili prosedurlardan keçdikdən sonra qüvvəyə minir.
