Azərbaycan Yerasx istiqamətində uzaq məsafədən atəş açır, heç bir irəliləyiş yoxdur. “Armenpress”in məlumatına görə, bunu müdafiə nazirinin müavini Arman Sargsyan jurnalistlərlə keçirdiyi brifinqdə Yerasx istiqamətində vəziyyətə istinadən bildirib.
“Hər halda heç bir panikaya ehtiyac yoxdur, çünki biz regionda, bu gərgin vəziyyətdə yaşamağı öyrənmiş ölkədə yaşayırıq. Biz ayıq-sayıq olmalıyıq, hər bir halda əminik ki, silahlı qüvvələrimiz və güc bölmələrimiz lazım gələrsə, adekvat cavab verir və verəcəkdir, lakin vəziyyətin gərginləşməsi arzuolunan deyil və ümid edirik ki, azərbaycanlıların bu destruktiv yanaşması bitəcək” , – deyə nazir müavini bildirib.
Sargsyanın sözlərinə görə, bu fenomenə təkcə Müdafiə Nazirliyi deyil, həm də Xarici İşlər Nazirliyi və bütün maraqlı dövlət qurumları reaksiya verir.
Ermənistan silahlı qüvvələrinin döyüş qabiliyyətinə gəlincə, Sargsyan vurğulayıb ki, ordunun öz problemləri var və vəziyyətə uyğun olaraq bu problemlər dəyişir.
“İstənilən halda, ordu istənilən belə addıma adekvat cavab verməyə hazırdır və buna borcludur”, – deyə Sargsyan yekunlaşdırıb.
