Fransa Dağlıq Qarabağda humanitar fəaliyyəti dəstəkləmək üçün Beynəlxalq Qırmızı Xaç Komitəsinə əlavə 3 milyon avro ayıracaq. “Armenpress”in məlumatına görə, bu barədə Fransa Xarici İşlər Nazirliyi Ermənistan Respublikasının xarici işlər naziri Ararat Mirzoyan ilə Fransanın Avropa və xarici işlər naziri Ketrin Kolonna arasında telefon danışığının təfərrüatlarını təqdim edən mesajda qeyd edilib.
Fransanın xarici işlər naziri Azərbaycan tərəfindən Laçın dəhlizinin bağlanması nəticəsində Dağlıq Qarabağ əhalisinin səkkiz aydan çoxdur əziyyət çəkməsindən dərin narahatlığını ifadə edib.
Kolonna atəşkəs razılaşmaları çərçivəsində götürdüyü öhdəliklərə zidd olan və danışıqlar prosesinə xələl gətirən Azərbaycanın davam edən blokadasından təəssüfləndiyini bildirib.
O, həll edilməmiş məsələlərin yalnız danışıqlar yolu ilə həll oluna biləcəyini və bunun ədalətli və davamlı sülhə nail olmağa imkan verəcəyini vurğulayıb. Nazir bunu aprelin 27 və 28-də Azərbaycan və Ermənistana səfərləri zamanı da qeyd edib.
Nazir Laçın dəhlizi ilə hər iki istiqamətdə insanların və yüklərin sərbəst hərəkətinin bərpası, əhalinin qaz və elektrik enerjisi ilə fasiləsiz təmin edilməsi çağırışını təkrarlayıb.
O xatırladıb ki, Azərbaycan öz beynəlxalq öhdəliklərini yerinə yetirməli, xüsusən də Beynəlxalq Ədalət Məhkəməsinin məcburi icra qüvvəsinə malik 22 fevral qərarını yerinə yetirməlidir.
Hər iki nazir avqustun 15-də Aİ-nin müşahidə missiyasının Ermənistan sərhədində patrul xidməti zamanı azərbaycanlıların atışmalarına da toxunublar. Kolonna bu hadisələrlə bağlı narahatlığını bildirib və Avropa missiyasına tam dəstəyini ifadə edib.
