Oktyabrın 10-da AŞPA-nın Payız sessiyası çərçivəsində keçirilən “Avropada sağçı ekstremist ideologiyanın demokratiya və insan haqlarına çağırışı” mövzusunda müzakirələr zamanı Ermənistan Parlamentinin AŞPA-dakı nümayəndə heyətinin üzvü Armen Gevorgyan da çıxış edib.
Armen Gevorgyan çıxışında qeyd edib ki, sağçı ekstremist ideologiyaları əsasən millətçi, ksenofob, militant və avtoritar əhval-ruhiyyədən ibarətdir.
“Burada Dağlıq Qarabağda yerli erməni əhalisinə qarşı tam etnik təmizləmə aparan ölkənin hakim partiyasının üzvü hesabat təqdim edib. Azərbaycan nümayəndəsinin insan haqları və demokratik idarəçiliklə bağlı hesabat təqdim etməsi olduqca qəribədir.
Son vaxtlar Dağlıq Qarabağda baş verən etnik təmizləmə təkcə erməniləri narahat etmir. Belə presedentlərin yaradılması böyük təbii qaz və neft ehtiyatlarına malik bir çox başqa diktaturalar üçün hərbi təcavüz üçün stimul olacaq və sağçı ekstremist ideologiyanın yanaşmalarına töhfə verəcək.
Bu gün Azərbaycan qeyri-qanuni və əxlaqsız olaraq çoxlu sayda ermənini əsir saxlayır. Onların arasında 25 il ərzində demokratik seçkilər nəticəsində seçilən, xalqının qanuni nümayəndəsi kimi onlara azadlıq və öz müqəddəratını təyin etmək üçün rəhbərlik edən insanlar var. Bundan fərqli olaraq isə Azərbaycan düz 30 ildir ki, eyni ailə tərəfindən idarə olunur. Bu, sağçı ekstremist ideologiyanın bir formasıdır, yoxsa Avropa Şurasının himayəsi altında yetişdirilən yeni demokratiya növü?
Həmkarlar, bu assambleyanın rəhbərliyi 2022-ci ilin aprelində həmmüəllifi olduğum “Dinin militarizasiyası və onun Avropanın Demokratik Təhlükəsizliyi üçün Təsirləri” adlı hesabatı aldı.
O qəti şəkildə göstərdi ki, Azərbaycan və Türkiyənin hökumətləri Avropanın liberal qanunlarından və dəyərlərindən sui-istifadə edərək, müvəqqəti “boşluqlar” vasitəsilə Avropa daxilində və Avropaya qarşı ziddiyyətlər yaratmağa cəsarət ediblər. Əsas məqsəd, məncə, Avropa dövlətləri ilə münasibətlərdə sövdələşmə vasitəsi kimi Avropada yeni həmrəylik formalarının yaradılması olub və olmaqda davam edir.
Çıxışıma yekun vuraraq demək istəyirəm ki, sağçı ekstremist radikalizmin yayılmasının qarşısını almaq üçün Avropa Şurası özünütəmizləmə və avtoritar dövlətlərin üzvlüyünün dayandırılması üçün çox mühüm ev tapşırığını etməlidir”, – deyə deputat bildirib.
