Azərbaycanla qarşıdakı danışıqlar zamanı Ermənistan Azərbaycanın Avropa İttifaqının vasitəçiliyi ilə razılaşdırılmış üç prinsip əsasında sülh müqaviləsi imzalamağa razı olub-olmaması ilə bağlı dəqiqləşdirmələr almağa çalışacaq.
Bunu ER baş naziri Nikol Paşinyan vətəndaşlardan birinin sualını cavablandırarkən deyib.
O qeyd edib ki, hazırda Azərbaycanın Ermənistan Respublikası ilə üç prinsip əsasında sülh sazişi imzalamağa razı olub-olmaması hələ də bəlli deyil.
“Həmin üç prinsip mayın 14-də və iyulun 15-də Avropa İttifaqı Şurası sədrinin, Azərbaycan prezidentinin və mənim üçtərəfli görüşlərim nəticəsində razılaşdırılıb. Bu prinsiplərdən birincisi belədir: Ermənistan və Azərbaycan Ermənistanın ərazisinin 29,8 min kvadrat kilometr, Azərbaycanın ərazisinin isə 86,6 min kvadrat kilometr olduğunu başa düşərək bir-birinin ərazi bütövlüyünü tanıyır. İkinci prinsip ondan ibarətdir ki, delimitasiya prosesinin siyasi əsası Alma-Ata bəyannaməsidir.
Yeri gəlmişkən, Alma-Ata bəyannaməsi Ermənistanın ərazisinin 29 min 800 kvadrat kilometr olduğuna əsasdır, çünki Ermənistan Respublikası Ermənistan Sovet Sosialist Respublikasının ərazisi ilə yaranmışdır.
Baş nazir əlavə edib ki, bu prinsipin gələcək inkişafı zamanı Ermənistan və Azərbaycanın sərhədlərinin delimitasiyası üçün Sovet İttifaqı Silahlı Qüvvələrinin Baş Qərargahının 1974-cü ildən 1990-cı ilədək olan xəritələrindən istifadə edilməsi barədə anlaşma əldə olunub.
Üçüncü prinsip, ölkələrin yurisdiksiyasına və suverenliyinə hörmət etməklə, qarşılıqlılıq və bərabərlik prinsipinə əsaslanan regional kommunikasiyaların açılmasıdır.
“İndi bəyanatları təhlil etsək, aydın deyil, Azərbaycanın həmin üç prinsipə əsaslanan sülh sazişini imzalamaqdan imtina etdiyini əminliklə iddia edə bilmərik, eyni zamanda, Azərbaycanın həmin üç prinsipə sadiqliyini bir daha təsdiqlədiyini də əminliklə deyə bilmərik. Danışıqlar zamanı bu məsələlərin və nüansların aydınlaşdırılmasına ehtiyac var”, – deyə baş nazir bildirib.
O qeyd edib ki, Azərbaycan Ermənistanın ərazi bütövlüyünü tanıdığını bəyan etsə də, onların Ermənistanın ərazi bütövlüyü dedikdə nəyi nəzərdə tutduğuna dair konkretliyə ehtiyac var. “Bu məsələlərin aydınlaşdırılması qarşıdan gələn danışıqlar proseslərinin əsas problemidir və biz onu həll etməyə çalışmalıyıq”, – Nikol Paşinyan yekunlaşdırıb.
