Baş nazir Nikol Paşinyan Avropa Parlamentinin Avropa İttifaqı ilə Ermənistan arasında daha sıx əlaqələrin və Azərbaycanla Ermənistan arasında sülh müqaviləsinin bağlanmasının zəruriliyi ilə bağlı qəbul etdiyi qətnaməni alqışlayıb.
Hökumətin iclasında Baş nazir xatırladıb ki, Avropa Parlamentinin bütün fraksiyalarının dəstəyini qazanan bu qətnamə 504 lehinə, 4 əleyhinə, 32 bitərəf olmaqla qəbul edilib.
O qeyd edib ki, 1991-ci il Alma-Ata Bəyannaməsinə əsaslanan qətnamə Ermənistan Respublikasının suverenliyi, ərazi bütövlüyü və müstəqilliyinə sarsılmaz dəstəyi ifadə edir, həmçinin Ermənistan və Azərbaycan arasında sülh səylərini dəstəkləyir.
“Avropa Parlamenti bu qətnamə ilə Ermənistan Respublikasının demokratiya, qanunun aliliyi, korrupsiyaya qarşı mübarizə sahəsində əldə etdiyi nailiyyətləri qeydə aldı ki, bu da ölkəmizin beynəlxalq qavrayışı üçün son dərəcə əhəmiyyətlidir. Qətnamədə keçən il oktyabrın 17-də Avropa Parlamenti sədrinin verdiyi bəyanatdan sitat gətirilir ki, Ermənistan Avropa İttifaqının mümkün hesab etdiyi qədər Avropa İttifaqına yaxın olmağa hazırdır və qeyd olunur ki, Ermənistan Respublikası Aİ üzvlüyünə namizəd olmaq üçün müraciət etmək istəsə, bu, Aİ təşkilatları tərəfindən dəstəklənəcəkdir.
Avropa Parlamentinin bu qətnaməsini alqışlayaraq hesab edirəm ki, bu, Ermənistanda ictimai müzakirə obyektinə çevrilməlidir. Bu, Ermənistan Respublikasının gələcəyinə baxışı müzakirə etmək üçün növbəti fürsətdir və ümid edirəm ki, Ermənistan Respublikasının siyasi qüvvələri, qeyri-hökumət təşkilatları, cəmiyyətin müxtəlif təbəqələri, vətəndaşlar Avropa İttifaqının bu mesajına öz münasibətini bildirəcəklər, çünki bu cür mesajlara hökumətdən və ya parlament çoxluğundan daha geniş reaksiya lazımdır”, – Paşinyan vurğulayıb.
Eyni zamanda, Baş nazir Ermənistan-Avropa İttifaqı əlaqələrinin daha da dərinləşməsi və inkişafı istiqamətində işi davam etdirmək üçün Ermənistan Respublikası Hökumətinin iradəsini ifadə edib.
