İran regionda gərginliyin azaldılmasına, eləcə də sülhün bərqərar olmasına töhfə verəcək istənilən addımı alqışlayacaq. İran Respublikasının Ermənistandakı səfiri Mehdi Sobhani “NEWS.am”-a müsahibəsində bildirib.
“Və gərginliyin artmasına səbəb ola biləcək və regional münasibətlərdə problemlər yarada biləcək hər hansı hərəkət bizim üçün qəbuledilməzdir. Atılan hər bir addımı nəticələrinə görə qiymətləndirək. Əgər bu addım sülhün bərqərar olmasına, münasibətlərin inkişafına və möhkəmlənməsinə gətirib çıxaracaqsa, təbii ki, biz bunu alqışlayacağıq.
Gərginlik yarada biləcək addımlara gəlincə, bunun nəticəsində Ermənistanla qonşu dövlətlər arasında münasibətlər zəifləyəcək, sizdən soruşuram, belə bir hərəkəti qəbul edəcəksinizmi?
Nəticələri, yəni İran-Ermənistan münasibətləri, ümumilikdə regionda olan münasibətləri görməliyik. Əgər NATO katibi gəlib getsə, 2-3 gündən sonra burada müharibə ilə bağlı narahatlıqlar artsa, bu, sizin üçün müsbət olacaq?”
Nikol Paşinyan NATO-nun baş katibi ilə görüşdə bəyan edib ki, NATO ilə yaxınlaşma regionun heç bir ölkəsinə qarşı yönəlməyib. Səfirin sözlərinə görə, Tehran belə təminatları Yerevandan alıb.
“Bəli, Ermənistan Respublikası hökuməti bizi həm NATO, həm də Aİ müşahidəçiləri ilə əmin etdi ki, bu əməkdaşlıq İrana qarşı deyil. Şübhə etmirik ki, Ermənistan Respublikası hökuməti o yolla gedəcək. Görək onlar elə hərəkət edəcəklər, yoxsa yox”, – səfir bildirib.
Səfir Mehdi Sobhani qeyd edib ki, Tehrana görə, xarici müdaxilələr regionda təhlükələrin artmasına səbəb olur.
“Biz hesab edirik ki, xarici müdaxilələr bölgənin təhlükələrinin artmasına səbəb olur. Əgər region ölkələri arasında münasibətlər gərginləşərsə, bölgədə gərginlik artırsa və biz sülhə doğru getmək əvəzinə, müharibə istiqamətinə keçəcəyiksə, təbii ki, təhlükəsizlik narahatlığımız da artır”, – İran səfiri qeyd edib.
Tehran Yerevanın Qərblə yaxınlaşmasının regiona risklər gətirə biləcəyi ilə bağlı narahatlıqların olub olmasına və bu narahatlığını Yerevana çatdırıb-çatdırmamasına dair sualına səfir cavab verib ki, bu, nəticədən asılıdır.
“Əgər onlar region ölkələrinin münasibətlərinə qarışsalar, o narahatlıq var. Bununla belə, bir daha təkrar etməliyəm: ER hökuməti bizi əmin etdi ki, narahat olmayın, hər şey qaydasındadır”.
