Şahan Qantaharyan Radar Armenia ilə söhbətində aprelin 5-də Brüsseldə Ermənistanın baş naziri Nikol Paşinyan, Avropa Komissiyasının sədri Ursula fon der Leyen və ABŞ dövlət katibi Entoni Blinken arasında keçiriləcək görüşə toxunaraq qeyd edib:
“Düşünürəm ki, bu, kollektiv Qərbin Ermənistanla bağlı siyasətini koordinasiya etdiyini sübut edir. Daha doğrusu, Vaşinqton və Brüssel arasında rol bölgüsü var idi. Üçtərəfli əməkdaşlığın açarı Rusiyanın təsirinin neytrallaşdırılmasıdır. Təbii ki, bu, Moskvanı narahat edir. Rusiyanın hansı reaksiya verəcəyi bəlli deyil.
Roma Nizamnaməsinə qoşulmaq, Rusiya qüvvələrinin “Zvartnots”dan çıxarılmasını tələb etmək, KTMT üzvlüyünün dondurulması bu zəncirin həlqələridir. Regionda Vaşinqton və Brüssel siyasi saatın əqrəblərini düzəldirlər.
Bütün bu proseslər Rusiya amilini hədəfə alıb. Təbii ki, Moskva Qərb ölkələrinin regional fəallaşmasından narahatdır”,- deyə ekspert qeyd edib.
NATO baş katibinin regional səfərinə gəlincə, Qantaharyan bildirib ki, beləliklə, NATO region ölkələri ilə əməkdaşlığı dərinləşdirmək istəyir.
“Tbilisi artıq uzun bir yol qət edib. Bakı NATO-nun ikinci qüvvəsinin kiçik qardaşıdır, Ermənistan istiqamətində isə fəal yeni siyasəti tətbiq edilir. Hər iki tərəfə mesaj verildi ki, NATO sülhün bərqərar olmasına dəstək verməyə hazırdır”,- o bildirdi.
