Ermənistan Baş nazirinin müavini Mher Qriqoryanın ofisi hazırda demarkasiya komissiyalarının Tavuş sektorunda Azərbaycanın tələb etdiyi kəndlərin köçürülməsini hansı sənədlər əsasında müzakirə etdiyinə aydınlıq gətirmir.
Qriqoryanın ofisi “Azatutyun” radiosunun yazılı sorğusuna cavab olaraq bildirib ki, sərhədlərin demarkasiyası və delimitasiyası ilə bağlı məsələlər hələ də müzakirə olunur.
“İki ölkənin demarkasiya komissiyalarının görüşlərinin nəticələri ilə bağlı rəsmi press-relizlər dərc olunur, onlardan kənarda tərəflər ikitərəfli qaydada təsdiq edilmiş iş proseduruna uyğun olaraq şərh vermirlər”, – deyə cavabda qeyd olunub.
“Azatutyun” radiosu sual verib ki, bu ərazilərin verilməsi konkret xəritələr əsasında müzakirə olunurmu, əgər müzakirə olunursa, hansı ilin xəritələri əsasında müzakirə olunur, onların təhvil verilməsi üçün konkret müddətlər varmı?
Qriqoryanın ofisindən bildiriblər ki, komissiyaların növbəti iclasının vaxtı hələ müəyyən edilməyib.
