Aprelin 17-də Yerevanda Ermənistan və Fransa Xarici işlər nazirlikləri arasında siyasi məsləhətləşmələr keçirilib. Məsləhətləşmələr Ermənistan Respublikası Xarici işlər nazirinin müavini Paruyr Hovhannisyanın və Fransanın Avropa və Xarici işlər nazirliyinin Kontinental Avropa Departamentinin rəhbəri, ATƏT-in Minsk qrupunun fransalı Bris Rokefo həmsədrinin rəhbərliyi altında keçirilib..
ER XİN-dən jurnalistə verilən məlumata görə, tərəflər qarşılıqlı maraq doğuran geniş spektrli məsələləri müzakirə ediblər. Ermənistan və Fransa arasında yüksək səviyyəli siyasi dialoqun daha da dərinləşdirilməsinin vacibliyi vurğulanıb.
Müdafiə, iqtisadiyyat, mədəniyyət, infrastrukturun inkişafı, institusional potensialın gücləndirilməsi və digər sahələrdə mövcud potensialın tam şəkildə tətbiqi imkanları və perspektivləri müzakirə edilib.
Mənbənin məlumatına görə, məsləhətləşmələr zamanı həmsöhbətlər beynəlxalq təşkilatlarda və digər çoxtərəfli platformalarda mövcud əməkdaşlığa, eləcə də ER-AB tərəfdaşlığı gündəliyi ilə bağlı məsələlərə toxunublar.
Dağlıq Qarabağdan məcburi köçkün düşmüş ermənilərin hüquq və ehtiyacları ilə bağlı Ermənistan Respublikasının bununla bağlı göstərdiyi dəstək, eləcə də humanitar xarakterli digər məsələlərə də baxılıb.
Qeyd olunur ki, həmsöhbətlər aktual regional və beynəlxalq problemlər ətrafında fikir mübadiləsi aparıblar. Ermənistanla Azərbaycan arasında münasibətlərin nizamlanması prosesinə toxunulub.
Nazir müavini Paruyr Hovhannisyan həmsöhbətini regionda baş verən son hadisələrlə tanış edib, əsas məsələlərdə ER-nin mövqeyini vurğulayıb.
Fransalı tərəfdaşlara Ermənistan Respublikası hökuməti tərəfindən hazırlanmış “Sülh kəsişməsi” layihəsi də təqdim olunub.
