Ermənistanla Azərbaycan arasında Tavuş hissəsində delimitasiya hal-hazırda Sovet İttifaqının ən son qanuni qüvvəyə malik olan xəritələri əsasında həyata keçirilir.
“Armenpress”in məlumatına görə, bu barədə Ermənistanın baş naziri Nikol Paşinyan mətbuat konfransında bildirib.
“Delimitasiya Sovet İttifaqının hüquqi qüvvəsinə malik ən son xəritələr əsasında həyata keçirilir”, – baş nazir bildirib.
Delimitasiyanın hansı xəritəyə əsaslandığını söyləməkdən niyə yayındıqlarına gəlincə, Paşinyan cavab verib ki, onlar konkret xəritəni sadalamaqla məhdudlaşmaq istəmirlər. “Düzdür, biz hazırda Kirants bölgəsində delimitasiya aparırıq, lakin Ermənistan sərhədinin perimetrinin tam delimitasiyasını təmin etməyə yönəlmiş hüquqi əsasları ifadə etmək bizim üçün vacibdir. Biz də praktikada buna uyğun hərəkət edirik”.
Baş nazir əmin edib ki, onlar bu mövzu ilə bağlı əvvəlki açıqlamalarından kənara çıxmayıblar, o məntiqlə hərəkət edirlər. Sovet İttifaqının dağılması zamanı Sovet Ermənistanı ilə Sovet Azərbaycanı arasındakı sərhədləri göstərən xəritələrdən istifadə olunur.
