Türkiyənin mayın 2-də İsraillə ticarətə tam qadağa qoyduğunu elan etməsinə baxmayaraq, Azərbaycan nefti Türkiyənin Aralıq dənizindəki Ceyhun limanında İsrailə gedən tankerlərə yüklənməyə davam edir.
Intellinews yazır ki, bu haqda “Globes” İsrail mənbələrinə əsaslanaraq yazır. Türkiyənin yaxın müttəfiqi olan Azərbaycanın İsraillə möhkəm əlaqələri var. O, İsrail üçün mühüm neft tədarükçüsüdür.
Xəzər dənizindən hasil edilən neft Bakı-Tbilisi-Ceyhun boru kəməri ilə Ceyhun limanına çatır və oradan tankerlər Hayfaya nəql edir.
Yanvarda İsrail Azərbaycan neftinin əsas alıcısı olub, ümumi dəyəri 297 milyon dollar olan 523,5 min ton yanacaq idxal edib. İsrailin digər mühüm neft tədarükçüləri Qazaxıstan və Nigeriyadır.
İsrail Mərkəzi Statistika Bürosunun məlumatına görə, İsrail ilə Türkiyə arasında ticarət ildə təxminən 6,2 milyard dollar, Türkiyənin ixracı isə təxminən 4,6 milyard dollar təşkil edir.
İsrail 2023-cü ildə Türkiyənin 13-cü ən böyük ixracat bazarı olub və Türkiyə ixracatının 2,1 faizini təşkil edib. İsrailin Türkiyəyə ixrac etdiyi məhsullar arasında neft məhsulları da var.
Aprel ayında Türkiyə limanlarından gündə təxminən 11 min barel benzin və dizel yanacağı keçib. Ankaranın İsraillə ticarəti donduracağına dair açıqlamasına təəccüblənən türk ixracatçılar mallarını üçüncü ölkələr vasitəsilə İsrailə göndərməyə çalışırlar.
Xatırladaq ki, Türkiyənin Ticarət nazirliyi mayın 2-də Ankaranın İsrailə ixrac və idxalı dayandırdığını açıqlamışdı. Ölkə prezidenti Rəcəb Tayyib Erdoğan da İsraillə Fələstin arasında gedən proseslərdə məqbul heç nə olmadığını, İsrailin indiyədək 40-45 min fələstinlini vəhşicəsinə qətlə yetirdiyini bildirib.
“Müsəlmanlar olaraq kənarda durub kənardan izləmək mümkün deyil. Daha çox gözləyə bilmədik, addımlarımızı atdıq. Bizim aramızda ticarətin həcmi 9,5 milyard dollar təşkil edib. Biz bu qapını bağladıq” – deyə Erdoğan bəyan etmişdir.
Mətn faktor.am-ə məxsusdur.
