Baş nazir Nikol Paşinyan elan edib ki, Rusiya tərəfi Lori və Tavuşda daşqınlar nəticəsində zədələnmiş dəmir yolunun bərpası üçün genişmiqyaslı işlər aparır.
“Biz beynəlxalq tərəfdaşlarımızla əlaqə saxlayırıq. Başa düşürəm ki, rusiyalı tərəfdaşlarımız dəmir yolunun tam fəaliyyətini bərpa etmək üçün geniş iş görürlər”, – deyən Paşinyan hökumətin yeni körpülərin tikintisi üçün beynəlxalq tərəfdaşlarla fəal iş apardığını və onların dəstək verəcəyinə ümid edildiyini bildirib.
Xarici işlər naziri Ararat Mirzoyan da qeyd edib ki, bəzi tərəfdaşlar fəlakətin nəticələrinin aradan qaldırılmasına töhfə verməkdə ciddi maraqlıdırlar. “Xüsusilə də körpü tikintisi üçün. Biz qalan məsələlərlə bağlı ehtiyacların aydınlaşdırılmasını gözləyirik, lakin bir neçə tərəfdaş həqiqətən maraqlı və istəklidir”, – Mirzoyan bildirib.
Baş nazir qeyd edib ki, fəlakətin nəticələrinin aradan qaldırılmasının ilkin mərhələsində beynəlxalq tərəfdaşlara ehtiyac hiss etmirlər. “İndi bizə insanların dəymiş ziyanının bərpası, ödənilməsi məsələsində real dəstəyə ehtiyac olacaq”.
